© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n Bewnans Ke yma Modred ow campolla Vortygernùs, kyn nag yw Vortygernùs person i’n gwary. Modred a lever adro dhodho yn udnyk fatell o va mytern Breten. An chif-whedhel derivys adro dhodho in textow erel yw ev dhe vos chyften brâs in Breten i’n pympes cansvledhen, hèn yw warlergh an Romans dhe omdedna dhyworth an enys. Vortygernùs a ros wolcùm dhe’n Saxons, Hengyst ha Horsa, gans aga luyow dhe dhos dhe Vreten rag y weres owth omlath warbydn an Byctyon. I’n dallath an Saxons a servyas Vortygernùs yn lel rag Vortygernùs a bromyssyas tir dhodhans. Wosa termyn y a rebellyas wàr y bydn, sêsya tir dhyworto ha gwil aga gwlascor aga honen in Soth-Ÿst a Vreten. Yma an hanow Vortygernùs ow styrya ‘Arlùth Uhelha’ ha Vortygernùs yw an form Latyn. In Kembrek Vortygernùs yw gelwys Gwrtheyrn. In Kernowek hedna a via Gorthern. Herwyth Jeffry Menow Gorthern a godhas in kerensa gans Rowena, myrgh Hengyst. Hèn o prag yth o va parys dhe ry radn vrâs a’y bow dhe’n Saxons, yn chyffar rag cafos an venyn yonk dhyworth hy sîra. Wàr an dyweth Gorthern a fias dhe Gembra. Cùssulys veu dhodho byldya tour crev in Eryry pò ‘Snowdonia’ rag gwetha y honen warbydn y eskerens. Yth esens orth y helghya i’n termyn-na hag yth hevelly y whre va kelly pùb dynas aral. An masons a welas fatell esa fùndacyon an tour dres nos ow sedhy aberth i’n dor. Comendys veu dhe Gorthern ytho trouvya maw nag o mab den y das ev. Y feu den yonk a’n par-na dyscudhys in Kerverdhyn in Kembra ha danvenys veu dhe Gorthern. Ev a wovydnas orth an den yonk prag na ylly y wonesyjy derevel an tour. An maw a leverys poll dowr dhe vos in dadn an fùndacyons. An poll a veu sehys saw whath ny ylly an masons byldya an tour. Y êth arta dhe’n maw hag ev a leverys bos dew ven in dadn an poll ha dyw dhragon in cùsk inhans. An dragons a veu dyfunys hag a wrug strîvya an eyl gans y ben. Hèn yw whedhel rag prÿs aral. An den yonk neb a’n jeva an skians gornaturek o henwys Merlyn. Yma an story-na ow kelmy Gorthern gans Arthùr Mytern, rag yth yw Merlyn person a bris in whedhlow an Tâbel Rônd. Ow tùchya Gorthern y honen, ev o gylty a wolcùbma an Saxons dhe Breten hag ytho êsya conqwest an enys gans an Saxons. Rag hedna Gorthern pò Vortygernùs a dalvia bos person melegys in cov Keltyon Breten Veur.