© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma Degol Peran passys hevleny, saw me a garsa leverel neb tra moy obma adro dhe’n sans y honen. An kensa mencyon a Peran Sans a gefyr i’n hanow tyller Carn Peran dhyworth an dhegves cansvledhen. Yma y hanow dhe aswon in henwyn tyleryow erel, Peran i’n Treth pò ‘Peranzabuloe’, Peran Porth, Peranudhnow ha Peran ar Wodhel. Kynth yw an sans onorys avell sans tasek Kernow, scant nyns yw tra vëth godhvedhys adro dhodho. Herwyth whedhel y vêwnans y feu va genys in Wordhen hag a dheuth dhe Gernow wàr legh men. Yma remnant an whedhel kemerys in mes a vêwnans Ciarán, sans a bris in Wordhen. Yth hevel fatell wrug nebonen desmygy fatell o an hanow Peran versyon Brethonek a’n hanow Godhalek Ciarán. In gwiryoneth nyns eus colm vÿth inter an henwyn Peran ha Ciarán. Nyns o Peran Godhal. Moy gwirhaval yw fatell o va Kernow, pò Kembro martesen, rag yth esa eglos sacrys dhe Peran in Kerdÿdh in Kembra i’n dedhyow coth. Nyns yw godhvedhys naneyl prag y feu Peran Sans kemerys avell sans kenedhlek Kernow. Yth hevel fatell wrug stenoryon Kernow y dhegemeres yn mabsans dre rêson y dhe geskerdhes i’n dedhyow coth gans creryow pò ‘relics’ an sans an pympes dëdh a vis Merth, spessly i’n radn-na a Gernow o gerys dâ rag hy sten, hèn yw an cost north a Gernow Cres. Mystery aral yw an qwestyon a vaner Peran, an baner du ha crows wydn warnodho. Nyns yw coth istory an baner-na. Neb prës i’n nawnjegves cansvledhen y feu an baner du ha gwydn degemerys avell baner Peran Sans hag ytho baner kenedhlek Kernow. Yth yw leverys fatell usy an baner ow referrya dhe lyw gwydn an sten oberys warbydn an du a vûn pò ‘ore’ an olcan nag yw oberys whath. Whedhel coynt yw hedna saw nyns ywa gwir. Haval yw an baner du ha gwydn dhe vaner coth Breten Vian an Groaz du, hèn yw crows dhu wàr vaner gwydnneb o baner nacyonal Breten Vian dhia an tredhegves bys i’n whêtegves cansvledhen. Pelha yma teylu nôbyl in Breten Vian, Pezran aga hanow. Yth yw hanow an teylu-na ogas dhe hanow sans Kernow heb mar. Scochon teylu Pezran yw crows dhu wàr gilva arhans. Dre lycklod y feu an form a Vaner Peran Sans growndys wàr an Groaz du poken wàr scochon teylu Pezran. Ha wotyweth mater rag marth ywa martesen nag o Peran an sans moyha kerys in Kernow i’n termyn eus passys. Myhâl arghel a’n jeva an onour-na. Me a garsa leverel moy adro dhe hedna i’n termyn usy ow tos.