© 2018 Nicholas Williams

Pùb gwir gwethys / All rights reserved'

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Sowsnek De Yow dhyrag Sul Pask yw gelwys ‘Maundy Thursday.’ Yma an ger maundy kefys in Sowsnek Cres, le may feu va benthygys dhyworth Frynkek. Maundé yw an form Frynkek ha hedna a dheu dhyworth Latyn mandatum ‘comondment.’ Warlergh debry an soper dewetha gans y dhyscyplys, an Awayl a lever fatell gowsas Jesu wortans indelma: Yth esof ow ry dhywgh comondment nowyth—why dhe gara an eyl y gela. Kepar dell wrug avy agas cara why, indella y tal dhywgh cara an eyl y gela. Ena Crist a gemeras towal ha bason a dhowr tobmys ha golhy treys y dhyscyplys. Dres an osow myterneth ha myternesow a wre dysqwedhes aga bos uvel dhe Grist in udn wolhy treys aga sojetys hag in udn ry boos, dyllas pò mona dhedhans. Hedhyw i’n Wlascor Udnys pùb part a’n ûsadow-na yw ankevys, marnas an mona yn udnyk. De Yow dhyrag Sul Pask pùb bledhen y fÿdh an Vyternes ow radna in mes mona specyal henwys ‘maundy money’ in mesk pobel dhôwysys rag an ocasyon. Yma an pab bytegyns whath ow colhy treys pobel dhyvers an jëdh-na. Warleny, rag ensampel, ev a wolhas treys nebes prysners. In Kernowek ‘Maundy Thursday’ yw gelwys De Yow Hablys ha’n term-na yw kefys in try thext dyffrans. In Kembrek an jëdh yw gelwys Iau Cablyd hag in Bretonek Yaou Gamblid. Cablys, Cablyd ha Kamblid aga thry a dheu dhyworth an ger Latyn Capitilavium ‘golhas an pedn’. I’n eglos Keltek Cristonyon nowyth a vedha besydhys wàr Pask. An bobel-na a wre ombarusy aga honen dres oll sêson an Gorawys rag recêva besydhyans ha Corf Crist De Sul Pask. May hallens y tempra aga horf bytegyns, dyfednys o dhedhans oll an seythednow-na gwil troncas, hèn yw, ‘to take a bath’. De Yow Hablys ytho y a rêsa omwolhy yn tâ ma na vêns ow flerya i’n termyn solempnytas an Pask. Heb mar y whre an Gristonyon nowyth-na remembra narracyon a’n soper dewetha i’n awayl. Yma an keth whedhel dhe verkya kefrÿs i’n gwary Kernowek Passio Christi. Ena Crist a wolgh treys an dhyscyplys saw Peder a grës y Arlùth dhe wolhy y dreys dhe vos meth brâs. Jesu a lever dhodho:

Taw, Peder, te ny wodhes

lemmyn pandra wrama dhis.

Mar ny’th wolhaf dre ow ras in nev ny vedhyth tregys.

Peder a gonveth an mater hag a worthyp:

Arlùth, dhybmo vy na as pedn na troos na vo golhys.