© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw Lamek complys in Jenesys le mayth yw rës dew aghscrif pò ‘pedigrees’ ragtho. In onen anodhans ev yw devedhys dhyworth Caym, kensa mab Adam hag Eva. In y gela ev yw dieskynyas pò ‘descendant’ a Seth, tressa mab Adam. Lamek yw tas Noy hag drog-pollat inwedh. Ev o hedna neb a dhalathas an galanas goos pò ‘blood feud.’ In gwary Kernowek Creacyon an Bÿs whedhel Lamek yw efanys nebes. I’n gwary Lamek a dherif fatell o y hendas Caym acowntys pòr bad den, saw ev yw prowt dhe vos liesgweyth lacka. Ev a lever in udn vôstya

Sur me yw an kensa

bythqweth whath a veu dyw wreg,

ha’n mowysy lower plenty

yma dhymm (nynj yns dainty);

me a's këv pàn vydnaf vy; 

ny sparyaf anodhans y

malbew onen a vo teg.

In Creacyon an Bÿs plesour brâssa Lamek yw helghya bestas gwyls. Nyns usy ev ow tebry kig an bestas-na rag, warlergh an Beybel, ny vedha kig gam debrys bys warlergh lyw Noy. Yma Lamek owth helghya bestas rag ûsya aga crehyn avell dyllas. Saw Lamek yw gyllys dall ha scant ny yll ev gweles tra vÿth. I’n gwary kefrÿs Lamek a wor fatell usy Caym, y hendas, whath ow pêwa. Mès yma Caym ow keles y honen i’n dyfëth, rag nyns ywa whensys dhe vos gwelys gans mebyon tus. Lamek ha’y servont a wel ow crowedha i’n bùshys best gwyls neb yw cudhys in blew hir. Yma an servont ow qweres Lamek, gwadn y lagasow, ow tehesy seth mes a’y warek warbydn an best ùncoth. Nyns ywa best bytegyns, saw Caym y honen. Ha seth Lamek a’n ladh. Yma neb jùstys ena, rag yth yw Caym, an kensa denladh, ledhys y honen dre dhorn onen a’y woos nessa. I’n gwary, pàn wrella Lamek dyscudha ev dhe ladha y hendas, yma va ow conery warbydn y vaw rag ev dhe weres dhodho dylla an seth. Lamek a lever dh’y servont:

A soweth gweles an prÿs!

Caym ow hengok yw marow!

Ragtho te a vÿdh ledhys,

a fâls-lader casadow!

Sqwattys yw dha empydnyon!

Ha gans lorgh Lamek a ladh y servont inocent. Ena yma an dhewolow owth entra hag ow kerhes enef velegys Caym dhe bainys heb dyweth in iffarn.