© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Grêss y kefyr henwyn teylu kepar ha Papandreou ha Papaconstantinou. I’n henwyn-na yma an element Papa- ow styrya ‘tas’, hèn yw ‘prownter, offeryas.’ Papandreou ytho yw ‘mab Androw prownter.’ In eglosyow ewngryjyk pò ‘orthodox’ an Ÿst, in Grêss, in Rùssya, hag erel, yma cubmyas dhe’n brontyryon demedhy. I’n dedhyow coth yth esa an eglos Keltek dhe gafos i’n enesow-ma hag y fedha prontyryon hag epscobow demedhys inhy. In Godhalek rag ensampyl ny a gav an hanow teylu ‘McTagart,’ hèn yw Mac an tSagairt ‘mab an prownter’ hag yma ‘MacAnaspie’, Godhalek Mac an Easpaig ow styrya ‘mab an epscop.’ In Bêwnans Meryasek yma tas ha mabm Meryasek ow tôwys ragtho benyn brias a bris, rag hy yw myrgh Conan, mytern Breten Vian. Yma Meryasek orth hy sconya. Ev a lever dhe Conan mytern ha dh’y das ha’y vabm:

Pesaf aragowgh omma

ow ascûsya,

why ha’m tas ha’m mamm kefrÿs:

ny vanaf omry dhe’n bÿs

na demedhy benytha.

Ha pols wosa hedna Meryasek a lever dhe epscop Kernow (‘Cornouaille’):

Agas pesy y fana

a ry dymmo vy ordrys.

Pronter bos me a garsa

corf Jesu dhe venystra,

mar mynn ow dyscans servya

genowgh pàn ven apposys.

Nyns o res dhe Meryasek bos dydhemeth rag bos ordnys prownter. I’n eglos Keltek prontyryon hag epscobow, dell wrussyn ny gweles, o tus demedhys yn fenowgh. Pelha in eglos in West dre vrâs y fedha alowys dhe’n brontyryon demedhy bys in Secùnd Cùssul a’n Laterân in dhêwdhegves cansvledhen. Ena rag an kensa prÿs y feu maryach an vebyon lien dyfednys yn tien. In gwary Bêwnans Meryasek, kynth yw Meryasek gwrës prownter, nyns usy ev ow recêva pluw vëth na charj vëth a enevow ha rag hedna nyns usy ev ow menystra Corf Crist. Dres termyn hir ev yw hermyt yn udnyk, ow pêwa y honen oll i’n gwylfos. Gwir yw ev dhe sawya clevyon dre allos Duw; saw nyns usy hedna ow tervyn ev dhe vos prownter. Dre lycklod Meryasek a vêwas i’n wheffes cansvledhen. Saw yth hevel fatell yw whedhel an gwary growndys wàr bêwnans a’n sans in Latyn screfys in Breten Vian i’n bymthegves cansvledhen. Dell hevel, yth esa an auctour Latyn ow cresy fatell o Meryasek prownter hag ytho fatell o res dhodho bos heb demedhy. An prownter dydhemeth o person ûsys i’n bymthegves cansvledhen. Saw in dedhyow Meryasek y honen prownter a ylly bos demedhys. Apert yw ytho ow tùchya an mater-ma, kepar hag in poyntys erel, na yllyn ny trestya dhe’n gwary Bêwnans Meryasek avell gwir-istory.