© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Cales yw trailya an ger Sowsnek ‘fairy’ dhe Gernowek. I’n Sowsnek Kernow an ‘fairies’ a vedha gelwys spriggyan, hèn yw spyryjyon ‘spirits’. Hag yma Nance ow comendya an bobel vian ‘the little people, the wee folk.’ Nyns yw an ger spyryjyon dyblans lowr. Pelha yth yw spyryjyon ha pobel vian i’n nùmber liesek. Nyns yw onen vëth anodhans ewn rag trailya ‘a fairy’ rag ensampyl. Y halsa bos ûsys corr ‘dwarf’ traweythyow martesen pò bùcka nos ‘hobgoblin’, saw ny’n jeves onen vëth a’n re-na an styr ewn poran. Rag hedna in ow gerlyver Sowsnek-Kernowek me a gomendyas benthygya ger dhyworth Sowsnek ha leverel fay, liesek fayes. In Sowsnek ny a wel an ger in hanow Morgan le Fay, an hudores in whedhlow an Tâbel Rônd. An ger fay in Sowsnek yw an keth ger avell fée ‘fairy’ in Frynkek. In crejyans an bobel i’n vrâssa radn a Ewrop, ha spessly in mesk an Geltyon, an Sowson ha’n Francas, an fay yw consydrys form a spyrys, a vëdh descrefys yn fenowgh avell person gornaturek. Yma lies whedhel dyffrans rag styrya devedhyans an fayes. I’n radn a’n whedhlow-na y yw cresys dhe vos eleth neb a godhas in mes a nev gans Satnas; in whedhlow erel y yw an dhuwow goth; in whedhlow erel y yw spyryjyon an re marow, in whedhlow erel whath y yw cresys dhe vos an bobel tregys i’n bÿs kyns ès dos mebyon tus. Yma an ger fay in Sowsnek ha fée in Frynkek ow tos dhyworth an ger Latyn fatum ‘destnans, tenkys.’ An form liesek yw fata ‘duwesow destnans; fates’ ha’n form-na a ros fée in Frynkek hag indelha fay in Sowsnek. In Frynkek an Osow Cres kefrÿs an ger fée a recêvas an gorfen ger pò ‘suffix’ -rie rag dysqwedhes styr abstract. Hedna a ros faerie in Frynkek ha fairy in Sowsnek, ger usy ow mênya ‘pystry pò pow an bobel vian pò onen a’n bobel vian.’ Pàn wrug vy comendya fay i’m gerlyver Sowsnek-Kernowek, me a gresy ow bosama an kensa den bythqweth dhe wil devnyth a’n wredhen-na i’n tavas. Yth hevel bytegyns fatell en vy myskemerys. In Trystan hag Ysolt gans Caradar yma radn a’n whedhel ow terivas adro dhe Trystan, pàn vo res dhodho gasa farwèl gans Isolt ha mos dhe Gembra. Ena yma va tregys gans Dûk henwys Gwylym, saw Trystan yw fest morethak heb Isolt. Rag derevel y spyrys nebes Gwylym a re dhe Trystan ky bian hudol. An ky yw henwys Pettygrew; yth yw y semlant marthys coynt hag ev a wor gwil prattys usy ow lowenhe Trystan. An text a lever adro dhe’n ky:

Ky gorhenys sur ev o

a Avalon devedhys,

a veu rës dhe’n Dûk yn ro

ha gans fairy danvenys.

Ytho an ger fairy a omdhysqwedhas in Kernowek rag an kensa prÿs in Trystan hag Ysolt, hèn yw i’n vledhen mil naw cans hanter-cans hag onen.