© 2019 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth yw an ger legest kefys in Gerva an Kernowek Coth, le mayth yw an hanow leverys dhe styrya ‘lobster’. Pelha Lhuyd a lever fatell yw an ger legest ûsys gans Kernowyon y dhedhyow ev gans an keth styr ‘lobster’. Apert yw, dell lever Lhuyd kefrÿs, fatell usy legest in Kernowek ow tos dhyworth an ger Latyn locusta ‘locust’. In Latyn, bytegyns y hyll locusta mênya try thra dyffrans: onen: ‘locust’; dew: ‘crestednek, crustacean’ ha try: ‘legest, lobster’. In Gerva an Kernowek Coth in dadn an ger Latyn locusta ny a gav culyak reden. Yma Lhuyd ow styrya culyak reden avell ‘grasshopper.’ Rag an treghvil ‘locust’ yma Nance ow comendya culyak reden askellek ‘winged grasshopper’. Nyns yw kewar culyak reden askellek dhe drailya ‘locust’, bytegyns, rag an culyak reden y honen a’n jeves askelly; ha pelha nyns eus dyffrans vëth in gwiryoneth inter ‘grasshopper’ ha ‘locust.’ Rag ‘locust’ gwell yw genef vy in Kernowek leverel locùst, liesek locùstys. An locùst yw culyak reden a’n teylu Acrididae. Dell yw ûsys yma an culyak reden ow pêwa y honen oll. Saw wosa dedhyow a sehes hag ena sêson may fëdh an glasneth ha’n losowys ow tevy yn uskys, yma empydnyon an bestas ow chaunjya. Ymowns y ow tallath lies’he yn frâs, ow cùntell warbarth in rûthow dynyver hag ow qwandra. Ena y a wra damach uthyk dhe’n drevas. Yth hevell fatell veu moy ès udn hes a locùstys in Pow an Sowson i’n êtegves cansvledhen saw ny wrussons y meur a vyshyf. Y fedha plâgys a locùstys kebmyn in dedhyow an Beybel hag ymowns y campollys liesgweyth i’n Scryptour Sans. An culyak reden yw treghvil, saw nyns ywa kepar ha’n tycky Duw. Ny wra va dos in mes a’n oy avell prëv del pò ‘caterpillar’ ha warlergh termyn gwil crysalys ha wotyweth omdhysqwedhes avell treghvil leundevys. In le a hedna yma an culyak reden ow tos in mes a’n oy avell treghvil hanter-dysplêgys pò nymf. Pàn vo va ow tevy, yma va ow mûtya, hèn yw dhe styrya, yma va ow corra dhywarnodho y grohen gales hag ow tysqwedhes in dadnhy crohen nowyth moy avauncys. Yma lyver Joel profet ow terivas adro dhe blag brâs a locùstys. Dell hevel yma peder agweth pò ‘four phases’ a dhysplêgyans an locùst campollys gans an profet pàn lever ev: Pynag oll dra a veu gesys gans hes an locùstys, an locùstys brâs re’n debras. Pynag oll dra a veu gesys gans an locùstys brâs, an nymfow re’n debras. Pynag oll dra a veu gesys gans an nymfow, re beu debrys gans culyogas reden erel. I’n lyver Levytycùs dyfednys yw dhe bobel Israel debry treghvil vëth. An excepcyons yw an treghvilas-na usy ow lebmel wàr aga garrow mellek pò ‘jointed legs’. An culyak reden pò an locùst yw onen a’n excepcyons-na. Rag hedna i’n Testament Nowyth ny a red fatell wre Jowan Baptyst debry locùstys ha mel gwyls.