© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Passio Christi yma dyspûtyans inter dew dhoctour ow tùchya carnacyon Crist. Yma onen a’n dhew ow teclarya y grejyans y hyll Jesus bos Duw ha den i’n kettermyn. Rag scodhya an tybyans-na yma va owth ûsya an exampyl a’n vorvoren pò ‘mermaid’, neb yw hanter den ha hanter pysk. Ev a lever:

Mirowgh worth an vorvoran

hanter pysk ha hanter den;

y vos Duw ha den yn wlân

dhe’n keth tra-na crejyans ren.

Dell usy ow wharvos yth yw moy ès udn whedhel adro dhe’n vorvoren kefys in tradycyons an bobel in Kernow. Yma onen anodhans ow terivas adro dhe dhen henwys Lûty a Eglos Cury wàr an Lysardh. Ev a veu dynys gans morvoren, saw kyns oll ny wrug ev dos gensy dhe’n bÿs in dadn an mor. Ev a recêvas dhyworty bytegyns an ro a bystry dâ, hag indelha ev a veu gwrës pystrior gwydn pò pellor. Ev a ylly stoppya tebel-hus. Naw bledhen warlergh y kensa metyans gans an vorvoren bytegyns yth esa ev in scath pàn dhewhelys hy rag y gemeres gensy. Ev a lebmys aberth i’n dowr ha ny veu va gwelys arta ha ny veu y gorf kefys bythqweth. Y fedha ken whedhel derivys in Eglos Senar wàr gost north Pennwydh. Benyn yonk a vedha gwelys orth servyssyow in eglos an bluw. Hy a gana an salmow ha’n hympnys marthys wheg. Ny wre hy dos ma’s traweythyow dres an bledhydnyow, saw hy a remainyas mar deg ha mar yonk dell o hy an kensa prës may feu hy gwelys. Hy a dhysqwedhas nebes les unweyth in den yonk henwys Mathew Trewella. Ev y honen ow canor dâ, hag udn Sul wàrlergh an servys ev a’s sewyas. Ny veu va gwelys bythqweth arta. Termyn pell warlergh hedna pàn esa pùscadoryon i’ga scath in mor ogas dhe Eglos Senar y feu gwelys morvoren ow tos in mes a’n dowr. Hy a besys capten an scath dhe dherevel y ancar nebes rag yth esa paw an ancar ow crowedha wàr dharas hy chy ha ny ylly hy entra in hy chy hy honen rag maga hy flehes. An bùscadoryon a wrug lavurya crev dystowgh rag alowa dhedhy entra in hy chy. An bùscadoryon inwedh a gresy hy dhe vos an keth benyn a wre dos traweythyow dh’aga eglos hag a wrug dynya Mathew Trewella gensy dh’y chy in dadn an todnow. Rag gwil dhe’n wharvedhyansow-na bos remembrys y a wrug bos kervys imach predn a’n vorvoren wàr jair i’n eglos an bluw. Ha’n chair gans an kervyans a yll bos gwelys bys i’n jëdh hedhyw. Yth hevel nag yw an whedhel-na ma’s desmygyans. Y fedha leverys fatell wre an vorvoren gans hy hân wheg ha’y thecter splann dynya marners. Rag hedna y fedha an vorvoren ûsys i’n osow cres avell tôkyn a’n pegh a dhrogwhansow an kig. Dre lycklod hèn yw an rêson rag an imach a’n vorvoren i’n Eglos Senar. Apert yw bytegyns na wre an Gernowyon meras orth an vorvoren avell arweth a begh. Hedna a yll bos gwelys i’n ûsyans gwrës a’n vorvoren in Passio Christi avell argùment dhe scodhya dyscans Cristyon an carnacyon.