© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An hanow Myhal yw qwestyon ow styrya ‘Pyw yw kepar ha Duw?’ Myhal Sans yw onorys brâs gans gans an Yêdhowon. In y vysyon i’n Testament Coth yma Danyel ow qweles el a lever dhodho fatell yw Myhal dyffresyas pò ‘protector’ pobel Israel. Myhal yw sans brâs dhe Gristonyon inwedh. Yma Pystyl Jûd ow ry dhodho an tîtel Myhal Arghel ‘the Archangel Michael.’ Yma hedna ow styrya ev dhe vos a’n keth roweth avell Gabriel ha Rafael. In lyver Revelacyon ny a red: Hag y feu gwerryans in nev: Myhal ha’y eleth a werryas warbydn an dhragon. An dhragon ha’y eleth a wrug omlath. Saw ny wrussons y overcùmya, naneyl ny veu aga thyller kefys in nev namoy. Mont Saint Michel i’n Normandy in Frynk a veu fùndys êthves cansvledhen. Yth hevel fatell veu managhty ‘St Michael’s Mount’ pò an Garrek Loos i’n Coos in Kernow growndys dew cans bledhen warlergh hedna avell chy myrgh a’n fùndacyon brâs. Yma eglosyow sacrys dhe Myhal Arghel in tyleryow erel in Kernow kefrës, rag ensampyl in Lannergh, Nant Wydhen, Lÿs Nowyth, Pennkevyl, Henlys Myhal ha Lanvyhal. Yth yw leverys kefrÿs Myhal Sans in gwiryoneth dhe vos sans tasek an Gernowyon. Mars yw hedna gwir, nyns yw Pyran ma’s sans tasek stenoryon Kernow yn udnyk. An nawves dëdh warn ugans a vis Gwydngala yw Degol Myhal. In Sowsnek hèn yw gelwys ‘Michaelmas’ hag i’n dedhyow coth yth o an jëdh-na jorna a bris. Yma ûnyversytas, scolyow hag ôstyansow lÿs pò ‘inns of court’ whath ow kelwel an termyn dhyrag Nadelyk Termyn Degol Myhal pò ‘the Michaelmas term’. Yma degol Myhal campollys moy ès unweyth in textow Kernowek. Rag ensampyl in Bêwnans Ke Modres a lever:

Ny gans Arthùr in y sal

kyn trycken bys Wool Myhal,

welcùm ny a vÿdh ena.

Hag in Bêwnans Meryasek Yùrl Rohan a lever fatell usy onen a dry fer Meryasek ow kemeres le Degol Myhal.

An secùnd fer sur a vëdh

sensys i’n pow benytha

ha’n tressa mis Gwyngala;

Degol Myhal bÿdh henna.

Myhal yw complys in Resurrexio Domini inwedh, le may ma va ow try enevow Adam hag Eva in mes a iffarn bys in lowena nev. Y feu Creacyon an Bÿs screfys in Hellys i’n vledhen mil whegh cans udnek. Pluw Hellys o sacrys dhe Myhal Arghel. Nyns yw marth martesen fatell usy Myhal ow kemeres part brâs i’n gwary. In Creacyon an Bÿs yma an Arghel kyns oll owth omlath warbydn Lûcyfer in nev hag ena warlergh y dhe beha owth herdhya Adam ha’y wreg mes a baradîs. Kynth yw Degol Myhal ow codha wàr an nawves dëdh warn ugans a vis Gwydngala, dell hevel y fedha degol aral dhodho, hèn yw an êthves dëdh a vis Mê. An jëdh-na yw jorna a bris in Hellys rag yma Dauns an Fer pò an ‘Furry Dance’ ow kemeres le an jëdh-na. Wàr an dyweth na esyn ny dhe ankevy hebma: Henry Jenner o kensa Bardh Meur Gorseth Kernow. Y hanow bardhek ev o Gwas Myhal.