© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw Kernowegoryon ûsys dhe’n hanow Alban rag an pow in north a Vreten Veur. In gwrioneth bytegyns ny woryn ny mars esa an hanow-na bythqweth in Kernowek. Nyns yw Alban kefys in Kernowek ma’s unweyth––in scrifow Edward Lhuyd, Kembro, hag dre lycklod ny wrug ev ma’s kemeres an hanow dhyworth yr Alban, an hanow Kembrek. An hanow yr Alban y honen yw lienek yn tien. Hanow kenyver jorna an Gembrîon yw Sgotland, hanow yw kefys rag an kensa prÿs i’n tredhegves cansvledhen. In Kernowek an hanow warrantus pò authentic rag Scotland yw Scotlond, poran kepar ha’n hanow Kembrek. An hanow Kernowek Scotlond yw kefys tergweyth in Bewnans Ke. In Bewnans Ke kefrës ny a gav Godhal ha Scot unweyth ha Kernow ha Scot in tyller aral. Auctour Bewnans Ke a lever in onen a’y nôtyansow fatell yw Scotlond gelwys Scotia in Latyn y dhedhyow y honen. Aswonys dhyn yw an hanow Latyn-na Scottia pò Scôsha in Nova Scotia pò Scotlond Nowyth, provyns i’n Ÿst a Ganada. Lies Scot dhyworth an Uheldiryow êth dhe Scotlond Nowyth in êtegves hag i’n nawnjegves cansvledhen, meur anodhans a’ga anvoth, ha nùmber brâs anodhans o côwsoryon Scot-Godhalek. Yma Scot-Godhalek côwsys whath in Scotlond Nowyth hag yma dasserghyans an tavas ena scodhys yn crev gans governans an provyns. In Godhalek Wordhen Scotlond yw gelwys Albain ha Scot pò den dhyworth Scotlond yw gelwys Albanach. Yma ûsadow arbednek in Conteth Donegal in north-west a Wordhen, le may ma Godhalek Wordhen côwsys whath. Y feu plantacyon a bobel dhyworth Scotlond ha dhyworth Pow an Sowson in Donegal i’n seytegves cansvledhen. Rag hedna yth yw Protestans moy in nùmber in Donegal ès in tyleryow erel in Wordhen.* In mesk Godhalegoryon Conteth Donegal yma an ger Sasanach, hèn yw Sows, den dhyworth Pow an Sowson, ow styrya Anglycan. Albanach ‘Scot’ wàr an tenewen aral yw esel a’n eglos Bresbytêryan. Yn fenowgh ny veu an Sasanach bythqweth in Pow an Sowson, ha ny veu an Albanach bythqweth in Scotlond. Ass yw a les an ûsadow-na rag studhyoryon a’n socyalogieth a grejyans.

*Hèn yw dhe styrya in whegh warn ugans conteth a Boblegeth Wordhen.