© 2020 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Baldùr yw onen a dhuwow an Tewtons. Woden o y das ha Freya y vabm. Ev o duw an tecter hag ev kerys gans pùbonen a’n dhuwow erel. Saw ev a dhalathas hunrosa a’y vernans y honen. Pàn glôwas y vabm a’y fienasow, hy êth adro ha pesy kenyver gwedhen na wrella hy nefra pystyga hy mab ker. Oll an gwëdh a assentyas. I’n gwetha prës ny wrug Freya hy fejadow tro ha’n uhelvarr pò ‘mistletoe’, dre rêson, dell hevel, nag o an plans-na gwedhen i’n styr stroth. An uhelvarr yw oleker pò ‘parasite’ usy ow tevy wàr wëdh erel. Ha pelha yth o an uhelvarr re vian ha re dhydhrok. Baldùr a gresy ev dhe vos dybystyk. Lôky o an duw dregynus hag ev a wovydnas orth Freya mar peu onen vëth a’n gwëdh ankevys gensy. Hy a leverys na wrug hy pesy an uhelvarr dhe bromyssya na wre va hùrtya Baldùr. Heb let Lôky a wrug seth a bredn an uhelvarr hag ev a berswâdyas Hodr an duw dall dhe setha Baldùr gensy. Indelha Baldùr a veu ledhys hag ev a skydnyas dhe’n bÿs awoles hag ev destnys rag nefra dhe remainya i’n tyller trist-na. Yth o whedhel Baldùr aswonys dâ gans an Natsîs hag in gwir onen a’n chif-Natsîs o Baldùr von Schirach. Ev a jùnyas an Party avell den yonk hag a veu gwrës hùmbronkyas Yowynkneth Hitler gans an Führer. Warlergh an gwerryans ev a veu cùhudhys in Nùremberg hag a servyas ugans bledhen in pryson. Ow tùchya an hanow Baldùr ny veu certan bys lebmyn pandr’o devedhyans an hanow. Saw an scolor Jerman Theo Vennemann re gomendyas styryans nowyth yw gwirhaval lowr. Godhvedhys yw nans yw termyn hir fatell eus lies ger in tavosow Jermanek, hèn yw, Sowsnek, Jerman, Frysyan, Danek, Nordek, h.e. na’s teves tardhyans Eynd-Ewrôpean. Yma meur a daclow in gramasek an tavosow Jermanek kefrÿs na yll bos styrys dhyworth an Eynd-Ewrôpek naneyl. Styryans Vennemann yw helma. In cres an wheffes cansvledhen dhyrag Crist yth o Carthaj (in Tûnysya hedhyw) an power brâssa i’n Cresvor. Hy cytysans inwedh o marners marthys dâ neb a fùndyas lies gwiasva avês dhe’n Cresvor in Portyngal ha Spayn ha pelha dhe’n North. Lies bath mona dhyworth Carthaj re beu dyscudhys in Breten Veur, spessly in Kynt. Yma Vennemann ow comendya fatell fùndyas pobel Carthaj gwlasvaow in Breten Veur hag adro dhe Vor an North in Frysya hag in Pow an Danow, martesen. Tregys i’n gwlasvaow-na y fedha pobel kemyskys ha lies anodhans dywyêthek in Pûnyk, tavas Carthaj, hag in Jermanek Avarr. An kebmysk-na a alsa styrya meur a daclow coynt in tavosow Jermanek. Rag ensampyl cales yw cafos tardhans Eynd-Ewrôpek rag an geryow folk, flock, plough, earth (Erde in Jerman), shilling ha penny, saw êsy yw aga thardha dhyworth Pûnyk. Nyns yw Baldùr kepar ha duwow an Eynd-Ewrôpeans, rag an dhuwow-na yw dyvarow, saw Baldùr a verwys. Pelha an hanow Baldùr yw pòr haval dhe hanow chif-duw Carthaj Ba’l ’Addir ‘Arlùth Galosak’, Baldir moy adhewedhes. Pûnyk, tavas Carthaj, o goos nessa tavas an Fenycyans. Hag y aga dew o tavosow Semytek ha pòr ogas dhe’n Ebrow. An Natsîs o fest Gorth-Semytek. Geseth pò ‘irony’ a via ytho mars yw Baldùr onen aga henwyn meurgerys, a dhevedhyans Semytek.