© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Mar teuta ha meras orth bath Grêk an dhew ewrô, te a welvyth warnodho pyctour a venyn yonk ow marhogeth wàr darow. An venyn-na yw gelwys Ewrôpa. Wostallath hy o onen a dhuwesow an Fenycyans, saw y feu hy gwrës part a vythologieth an Grêkys. An whedhel adro dhe Ewrôpa yw helma: udn nos pàn esa hy ow qwil hunros, hy a welas dyw venyn owth argya. Benenes hy hunros o an dhew vrâstir a Âsya hag a Ewrop. Âsya a leverys fatell veu Ewrôpa genys in Fenycya, hèn yw in Âsya, hag ytho yth esa hy ow longya dhe Âsya. An venyn aral a leverys nag o hedna bern, rag y whre tas an dhuwow, Jûpyter (Zews in tavas an Grêkys) ry Ewrop dhedhy; ha dre rêson a hedna an brâstir a vedha henwys Ewrop wàr hy lergh. Herwyth an whedhel, Ewrôpa a veu ancombrys brâs dre hy hunros ha pàn wrug hy dyfuna, hy a elwys hy mowysy dhedhy ha warbarth gansans y hy êth ryb an mor rag coselhe hy brës. Jûpyter a aspias an benenes yonk ha spessly Ewrôpa, rag hy o an vowes tecka oll intredhans. Ev a dheuth dhyragthans in form a darow teg gwydn, odour a flourys dhywarnodho hag ev pòr glor. Oll an mowysy a fystenas dh’y jersya, ha pàn wrug ev growedha wàr an dor dhyrag Ewrôpa, hy a gramblas wàr y geyn. Heb let an tarow a labmas in bàn ha ponya aberth i’n todnow. Jûpyter a dhros Ewrôpa wàr y geyn dhe enys Crêt. Ena an venyn yonk a dhemedhas an mytern hag ev a asvabas oll hy mebyon, kynth o Jûpyter aga thas. Herwyth an Grêkys brâstir Ewrop a veu henwys in onour Ewrôpa. Saw yma rêson dhe dhowtya an story. An hanow EwrôpaEwrôpê yw hanow Grêk, ha nyns yw apert prag y feu hanow Grêk rÿs dhe bensevyges genys in Fenycya. Nessa, i’n whedhel yth yw leverys fatell o Ewrôpa an vowes tecka in mesk oll an benenes yonk, saw yma an hanow Ewrôpa ow styrya ‘ledan hy fâss.’ Nyns yw cler prag y fedha mowes, ledan hy bejeth, consydrys sêmly dres ehen. Tressa, awos hunros Ewrôpa, ny wrug Jûpyter dry Ewrôpa dhe vrâstir Ewrop. Ny wrug ev hy dry pelha ès Crêt. Ny settyas Ewrôpa troos bythqweth in brâstir Ewrop y honen. Yth hevel fur ytho whelas devedhyans an hanow Ewrôp in ken tyller. Ewrôpa, herwyth an whedhel, a veu genys in Fenycya hag yth esa an Fenycyans ow côwsel tavas Semytek. I’n tavosow Semytek yma ‘ereb, ‘erebu ow styrya ‘gordhuwher.’ Rag an poblow Semytek yth esa Ewrop in qwartron an howlsedhas, hèn yw, i’n west. In gwir yth yw an ger rag ‘gordhuwher’ ûsys rag an howlsedhas pò an west in lies tavas aral. Preder, rag ensampyl, a’n ger Jerman Abenland ‘tir an gordhuwher, an West’. Dre lycklod ytho gwredhen an hanow Ewrop a yll bos kefys i’n geryow Semytek rag ‘gordhuwher, howlsedhas.’ Kynth yw desmygyans pur an whedhel Grêk ow tùchya Ewrôpa, yma va ow provia pyctour teg rag bath Grêk an dhew ewrô.