© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Hevleny yw an vledhen dyw vil ha peswardhek, hèn yw dhe styrya udn cans bledhen dhyworth dallath an Gwerryans Brâs, nawnjek peswardhek bys nawnjek êtek. Kyn whrug lies Godhal omlath rag an Vreten Veur i’n strivyans-na, hanter-cans mil ogasty a verwys ino, nyns o ûsys in Wordhen dres lies bledhen côwsel adro dhe’n gwerryans Praga? De Lun Pask nawnjek whêtek y wharva rebellyans in Dulyn a dhalathas an kenkyans inter Wordhen ha’n Vreten Veur hag a lêdyas dhe anserhogneth Wordhen in vledhen dew warn ugans. Moy a bris o Rebellyans Pask obma ès an Gwerryans Brâs. Nebes moy ès ugans bledhen alebma bytegyns taclow a dhalathas chaunjya nebes. Y feu glanhës ha restôrys lowarthow cov Islandbridge in Dulyn rag gwerroryon an Gwerryans Brâs, hag egerys veu an lowarthow rag an kensa prës. Deg bledhen wosa hedna Park Cres an Wydhyly pò ‘Irish Peace Park’ in Messines in Beljùm in cov an dus dhyworth Wordhen a verwys i’n Gwerryans Brâs a veu egerys gans Myternes Elizabeth, gans Albert Myter Beljiùm ha gans Mary McAleese, Presydent Wordhen. Kebmyn lowr lebmyn ywa gweles myllas cogh ‘red poppies’ war gôtys tus in Dulyn orth dallath mis du. Nyns yw an pyctour sempel bytegyns. I’n vledhen nawnjek try ugans ha whegh, hanter-cans bledhen wosa Rebellyans Pask, y feu das’henwys onen a dry chif-gorsaf Dulyn. An hanow coth o gorsaf Kingsbridge. Alena rag y fedha an gorsaf henwys Gorsaf Heuston, in onour Sean Heuston, scrifwas hens horn, hag onen a lêders an rebellyans. Wàr fos an gorsaf wàr jy an viajyor hedhyw i’n jëdh a yll gweles dyw lehen cov. An kensa yw sacrys dhe gov an dus dhyworth an servys trainow a verwys in army Breten Veur i’n Gwerryans Brâs. Deg lath pelha ès hodna an viajyor a yll gweles ken lehen, in onour an Wydhyly a wrug omlath gans Sean Heuston warbydn an Sowson. An kensa bagas a wrug omlath gans an Sowson warbydn an Jermans, an secùnd gans gweres Jerman warbydn an Sowson. Êsy yw ytho convedhes prag yth yw istory an bledhydnyow-na re gomplek rag lies onen i’n pow-ma.