© 2016 Nicholas Williams

Pùb gwir gwethys / All rights reserved


Clyckya obma ha goslowes / Click here to listen

Maria Wosek.m4a


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag lies huny yma an hanow Maria Wosek, ‘Bloody Mary’ in Sowsnek, ow styrya cocktêl gwrës a vodca hag a sugan aval kerensa. Y leveryr bos dâ an Varia Wosek rag cùrun spern pò ‘hangover’. In gwiryoneth Maria Wosek o nebonen in istory an enesow-ma. Maria Tewdar o hy hanow ewn ha hy o myrgh a’n Ethves Henry hag a’y kensa gwreg, Catheryn Aragon. Maria a dheuth dhe’n tron pàn verwys hy broder yonk hag anyagh Edward, nag o mytern ma’s dres whegh bledhen. Yth esa skeus a Varia dhe lies huny i’n gort dre rêson hy dhe vos Catholyges, hag y a assayas gwil myternes a’n Arlodhes Jane Grey, cosyn Edward ha Maria, rag Jane o Protestant. Maria a wrug dhe Jane Grey bos dybednys kyn nag o hy ma’s seytek bloodh. In hy rain Maria a gompressas an Protestans yn tydn hag a worras meur anodhans dhe’n mernans. Drefen y dhe vos heretickys y a veu leskys yn few. An re moyha a bris martesen a veu an epscobow Protestant Cranmer, Latimer ha Ridley. Dyghtyans cruel Maria Tewdar ow compressa an Protestans a dhendylys rygthy an les’hanow Maria Wosek. In hy rain hy Edmund Bonner, epscop Loundres, a wrug dyllo y lyver in Sowsnek adro dhe’n grejyans Gatholyk. Y feu an pregowthow i’n lyver trailys dhe Gernowek gans Jowan Treger hag y yw lebmyn an text hirra usy dhyn in agan êth ny. Pàn o Maria myternes Pow an Sowson hy a wrug demedhy gans Felyp, mytern Spayn, ha Felyp o consydrys mytern Pow an Sowson dre wir y wre’ty. Ny wrussons denethy flogh vëth. Lies bledhen wosa mernans Maria Felyp a whelas daskemeres y wlascor y honen, dell gresy ev, dhyworth an vyternes nowyth Elizabet, gans lu lestry brâs, an Armada Spaynek. Ny wrug a viaj soweny. Yth o governans Maria Tewdar bysy in Wordhen kefrës. Y feu tiryow in cres an pow kemerys dhyworth an chyftens Godhalek hag y feu dew gonteth nowyth gwrës anodhans: Conteth an Mytern, hèn yw Felyp mytern Spayn, ha Conteth an Vyternes, Maria Tewdar hy honen. Chif-tre Conteth an Vyternes o henwys Maryborough pò Marbra dell levery an bobel. Chaunjys yw an hanow lebmyn dhe Port Laoise. A pe fur tavernoryon Port Laoise, Marbra i’n dedhyow coth, y a vynsa martesen rag prow an douristieth henwel Maria Wosek pò Bloody Mary cocktêl sodhogyl aga thre.