© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a dhalathas desky Kernowek yn avarr i’n bledhydnyow try ugans. Me a jùnyas an Kelgh Keltek, cùntellyans a bobel dhyworth powyow Keltek dyvers, a wre screfa an eyl dhy gela in onen a’n tavosow Keltek. Yth o an Kelgh Keltek restrys gans Miss Joan Petchey in Trûrû. Hy a wre danvon dhyn rol an esely erel a yllyn ny screfa dhodhans. A brow brâs o an Kelgh dhe studhyoryon an tavosow Keltek, rag i’n termyn-na ny’gan bedha jynys amowntya na pellgowsoryon pocket. Warbarth gans an Kelgh Keltek yth esa Miss Petchey ow restry scol hâv Kernowek in Trûrû pùb bledhen. Pàn en vy studhyor gradhek in Resohen ow qwil cors in tavosow Keltek, me a offras ow honen dhe Miss Petchey avell gweresor i’n scol hâv. Talek, an Bardh Meur a’m gwarnyas fatell ylly Miss Petchey bos sarf. Me êth dhe Trûrû bytegyns ha metya gans Miss Petchey rag an kensa prÿs. Hanow bardhek Miss Petchey o Elowen pò ‘Elm tree.’ Nyns o hy kepar ha’n wedhen nôbyl. Nyns o hy tanow, ha’y fâss o nebes cogh. Orth an kensa golok ny wrug vy hy flêsya hy naneyl. Ow côwsel dhe blebmyk orthyf hy a leverys fatell esa hy ow cresy ow bosama re leun ahanaf ow honen. Yn cosel me a leverys dhedhy hy dhe gafos argraf myskemerys ahanaf. Pelha me a wrug hy assûrya fatell en vy devedhys dhe’n scol hâv dh’y gweres pynagoll fordh a yllyn. Ny a veu cothmans dâ dhia an termyn-na, Ny gowsas hy yn lybm orthyf bythqweth arta. Kynth o Elowen caradow lowr genef vy, hy a ylly bos cales orth pobel erel, ha hy a wre ges anodhans pàn nag êns y present. Hy a dherivas whedhel dhe dhyscyplys an scol hâv adro dhe dhen esa ow tesky Kernowek in onen a’y classys in Trûrû. Pàn veu govydnys orto trailya ‘three cats’ dhe Gernowek, ev a worthebys *try cathas. An gorthyp êwn a via teyr hath. Elowen a’n cafas pòr wharthus y hylly an den truan gwil try errour in dew er yn udnyk. Apert o udn dra in hy hever. Ny’s teva hy avell goos nessa pò teylu ma’s hy mabn o hy tregys gensy. An mater moyha a les in hy bêwnans o an tavas. Hy o onen a’n nyver bian a bobel a wre whelas cowsel Kernowek. Wosa kemeres radn in scol hâv Kernowek dyw vledhen an eyl wosa hy ben, me êth dhe Wordhen dhe studhya Godhalek, ha’m cowethyans gans Elowen a cessyas. Pàn verwys hy bytegyns me a wodhya fatell wrug an tavas Kernowek kelly onen a’y gampyoresow moyha stowt.