© 2020 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Tro ha dyweth an nawnjegves cansvledhen Henry Jenner i’n Gwithjy Bretednek a dheuth wàr dext Kernowek na veu merkys kyns. Ev a welas adro dhe dhewgans lînen a wersyow wàr geyn chartour dhyworth Eglos Helans pò ‘St Stephen in Branell.’ Y feu an lînednow Kernowek screfys tro ha’n vledhen mil ha peswar cans. Yma an gwersyow in form a gows dhyworth udn den hag ev ow talkya kyns oll gans den yonk. Yma va owth offra dhodho mowes avell gwreg. Ev a lever
dhymmo deus nes
ha dhis y rov mowes
ha fest onen deg
Ena ev a gôws orth an vowes hy honen saw in mes a glowans an den yonk. Yma va ow comendya dhedhy surhe fatell vëdh hy honen an vêstres i’n maryach ha may whrello an den yonk pupprÿs warlergh hy bolùnjeth hy. Yma an qwestyon a vêstry in maryach ow qwil dhyn remembra fenten Keyn Sans inter Porth Bian ha Lyskerrys. Herwyth an whedhel Keyn Sans o myrgh Breghan Mytern, Kembro a’n bympes cansvledhen. Vertu fenten Keyn yw hebma: pynag oll a’n priosow nowyth, an gour pò an venyn, a wrello eva dowr in mes a’n fenten kyns an prias aral, an person-na a vynsa rêwlya in maryach i’n dedhyow esa ow tos. Yma whedhel derivys inwedh a dhen yonk nowyth-demedhys ow fystena dhe’n fenten dhe eva a’n dowr hudol dhyrag y wre’ty. Saw yma va ow tyscudha fatell o kemerys gans an venyn dhe’n solempnyta botel lenwys a’n dowr marthys. Kettel veu colenwys an maryach, hy a gemeras an botel in mes a’y dyllas nessa hag eva ganowas dhyworto kyns ès an gwas dhe gafos an chauns a dhrehedhes an fenten. Saw gesowgh ny dhe dhewheles dhe’n gwersyow war geyn an chartour. Certan scoloryon re gomendyas fatell yw an bardhonek dhe vos convedhys avell neb tra leun ino y honen. Yth o an lînednow dhe vos leverys avell radn a’n maryach y honen. Ny gresaf vy poynt fatell yll hedna bos gwir. Dre lycklod yth esa an darn ow longya dhe dext hirra, gwary kepar ha Bewnans Meryasek pò Bewnans Ke. Yth esa an gwary ow terivas an istory a neb sans. Chif-person an gwary yw an den yonk, usy an den aral owth offra dhodho mowes teg dov avell gwreg. In radn a’n gwary esa ow sewya an darn yma an den yonk ow sconya kemeres an vowes avell y brias, rag ev yw porposys heb demedhy. Determys ywa dhe sacra y vêwnans dhe Dhuw, poran kepar dell wra Meryasek sconya maryach orth dallath gwary y vêwnans. Now otta nowodhow dâ ow tùchya darn an chartour. Dyllans nowyth a’n text re beu lonchys agensow, usy ino pyctours a’n chartour hag a’n gwersyow wàr y geyn, warbarth gans an text i’n spellyans gwredhek, in Kernowek Standard, trailyans Sowsnek ha raglavar adro dhe’n text y honen in tradycyon liednek an Kernowek. Yth yw oll an re-na pryntys in udn lyver gans dyllans nowyth a’n bardhonek hir aswonys genen avell Passyon agan Arlùth. Me a vydn côwsel adro dhe’n lyver nowyth -na nessa seythen.