© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a gôwsas agensow adro dhe’n fordhow dyvers in Kernowek rag trailya an ger Sowsnek ‘one.’ Ny a welas fatell ywa êsy dhe drailya ‘the small ones’, ‘the big ones’, ‘the other ones’ gans an re bian, an re brâs hag an re erel. Mars usy an geryow ‘the big ones’ ow referrya dhe bobel, warbarth gans an re brâs ny a yll leverel an vrâsyon. Ha rag ‘the other ones’ ny a yll martesen leverel an remnant, an remenat. Dell leverys vy seythen alebma, ny yll huny bos ûsys in lavarow kepar ha ‘the white one’, ‘the new one’, h.e. In contrary part res yw dasleverel an dra y honen. Ytho rag ‘I prefer the red car to the black one’ ny a vydn leverel gwell yw genef an carr rudh ès an carr du. Hag ot ken caletter. In Sowsnek kebmyn yw côwsel adro dhe ‘loved one, loved ones.’ Nyns yw êsy trailya an re-na, rag ensampyl in ‘if you have just lost a loved one’ pò ‘if you want to leave your house to your loved ones’? An gùssul welha yw leverel: mar qwrusta namnygen kelly nebonen kerys genes ha mars osta whensys dhe gemyna dha jy dhe’n bobel yw kerys genes. Yth yw an ger ‘one’ ûsys in Sowsnek avell rakhanow anpersonek, rag ensampyl i’n lavarow kepar ha ‘at first one doesn’t see anything’, ‘if one misses an opportunity like that, one is likely to regret it later.’ Now in Kernowek rag lavarow a’n par-na ny a yll ûsya formys dystak pò ‘autonomous forms’ ha leverel: wostallath ny welyr tra vëth; ha mar qwrer kelly chauns a’n par-na, dre lycklod y fedher edrygys. Res yw perthy cov, bytegyns, nag yw formys a’n sort-na kefys i’n tavas hengovek wosa Bêwnans Meryasek in very dallath an whêtegves cansvledhen. Gwell yw martesen ûsya an voys godhevyk pò ‘passive voice.’ Hèn yw dhe styrya: wostallath nyns yw gwelys tra vëth ha mar pÿdh kellys chauns a’n par-na gans nebonen, dre lycklod ev a vëdh edrygys. Hag otta poynt bian aral. In Kernowek an fordh êwn dhe wovyn ‘which one?’ yw pyneyl, rag ensampyl i’n lavar-ma in mes a Passio Christi: pyneyl o moyha senjys an keth den-ma dhe gara? ‘who was the most bound to love that same man?’ Wàr an dyweth res yw dhybm meneges an fordh êwn in Kernowek dhe leverel, ‘one another’ ha ‘the one…the other.’ Otobma nebes somplys in mes a’n textow: me a vynn don an eyl penn ‘I will carry the one end’ (Bêwnans Meriasek) ; an re-ma yw contrary an eyl dh’y gela these are contrary the one to the other’ (Tregear); awos bos an Frynkek fin parys dhe gemeres wàr an eyl, ha’n Sowsnek nôbla wàr y gela ‘since the elegant French is ready to swamp the one and the more noble English the other’ (Nicholas Boson)Mars yw benow an dhyw hanow, nena hy ben yw êwn in le y gela: Duw a vynn shâmys ow bos ha’m garr settys dres hy ben ‘God wishes to shame me with one leg crossed over the other’ (Bêwnans Ke).