(25) Marathôn - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag lies huny yma marathôn ow styrya resegva hir. In gwiryoneth an ger yw hanow tyller in Grêss usy ow mênya park fenokel pò ‘fennel field.’ Devedhyans hanow an resegva yw kepar dell sew. I’n vledhen peswar cans ha naw deg dhyrag Crist an Persyans in dadn Dariùs aga mytern a dheuth dhe bow an Grêkys rag y gonqwerrya. Resor galwansek henwys Fidypydês a veu danvenys dhyworth Athênas dhe Sparta rag pesy pobel an cyta dhe dhos ha gweres an Athênyans warbydn an Persyans. Kynth o an Spartans whensys dhe wil gweres, nyns êns y frank dhe dhos heb let, rag ny yllens terry aga laha aga honen. Ny yllens omlath erna ve leun an loor hag ytho res o dhodhans gortos. Fidypydês a dewhelys in udn bonya dhe Athênas hag ena mos dhe’n tyller henwys Marathôn adro dhe bymp mildir warn ugans dhe’n north a Athênas. Ena in park brâs an fenokel ev a gemeras part i’n vatel warbydn an Persyans. Y feu an Persyans fethys yn crev. I’n tor’-na Fidypydês a veu danvenys dhe Athênas may halla ev declarya dhe dus an cyta an Athênyans dhe gafos an vyctory. An whedhel a lever ev dhe dhos dhyrag rewlysy Athênas, cria yn mes χαίρετε νικῶμεν (bedhowgh lowen; ny re fethas) ha codha wàr an dor stag ena hag ev marow. Orth dyweth an nawdhegves cansvledhen y feu resegva hir dalethys avell radn a’n gwariow Olympek o nowyth dasvewys. Pelder an resegva o dew ugans kilomêter pò adro dhe bymp mildir warn ugans, hèn yw dhe styrya ogas dhe’n pelder dhyworth Marathôn bys in cyta Athênas hy honen. An hanow Marathôn a veu rës dhe’n resegva in onour Fidypydês. Mars yw gwir an whedhel derivys adro dhe Fidypydês, ev a bonyas cans ha hantercans mildir dhyworth Athênas dhe Sparta ha wàr dhelergh. Ena ev êth dhe Marathôn hag omlath warbydn an Persyans. Wosa an vatel ev a bonyas adro dhe bymp mildir warn ugans dhyworth Marathôn dhe Athênas rag delyfrya an nowodhow dâ. Mar qwrug ev merwel, ny via marthys. An gwiryoneth yw bytegyns, nag yw gwir whedhel Fidypydês. Y feu an story desmygys lies bledhen warlergh y vernans. Ny alsa den vëth ponya kebmys ajy dhe nebes dedhyow. Lowr yw ponya pymp mildir warn ugans rag den vëth.