(258) Desmygow


© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An desmyk tradycyonal pò ‘traditional riddle’ yw gwers cot ow tescrefa neb tra in geryow gwiùs pò andydro, ha res yw dhe’n woslowysy desmygy pandr’yw an dra intendys. Aswonys dâ yw an desmyk Sowsnek ‘Humpty Dumpty’. Ot obma trailyans in Kernowek dasvêwys:

Bothan Crothan o sedhys wàr fos.

Bothan Crothan a godhas yn poos.

Ny ylly oll soudrys ha mergh an mytern

y worra arta warbarth kynth o dhedhans bern. 

An gorthyp heb mar yw ‘Oy’. Hag ot obma ken desmyk Sowsnek: What always runs but never walks,/ often murmurs, never talks,/ has a bed but never sleeps,/ has a mouth but never eats? An gorthyp yw awan pò ryver. Yma desmygow kefys in lies tavas, an tavosow Keltek comprehendys. Ot obma desmyk Godhalek:

Tanaí thíos,

leathan thuas,

ag ligean a scíthe

agus a lámh ina chluais.

Hèn yw dhe styrya: ‘Cul awoles/ ledan avàn,/ pàn vo va ow powes/ yma y dhorn in y scovarn.’ An gorthyp ewn yw kelorn pò bùcket. Yma lies desmyk kefys in Bretonek inwedh, rag ensampyl:

Un itron penn ruz azezet

war ur skaoñ c’hlas dantelezet.

Ar vugale zo sod ganti

ha digor a gav e pep ti.

In Kernowek hedna a via ‘Arlodhes rudh hy fenn esedhys/wàr scavel wer dhensak./ Yth yw an flehes muscok rygthy/ha hy yw wolcùm in pùb chy.’ An gorthyp yw syvien pò ‘strawberry’. Mar bell dell worama nyns eus ma’s udn desmyk tradycyonal kefys in Kernowek. Y hyll hedna bos gwelys in lyver Pryce. Yth ywa indelma:

Flogh a veu genys in mis Merth.

Ny a drohas y vêgel in mis Est.

Ev a ros towl

dhe Prownter Powl

mis Du kyns Nadelyk.

Yma y vêgel ena ow mênya ‘his navel.’ An gorthyp yw barlys pò ‘barley.’ Yma Pryce ow styrya an desmyk indelma: An barlys a veu gonedhys in mis Merth. Trehys veu in mis Est. Coref a veu gwrÿs anodho ha Prownter Powl a evas dewas a hedna in mis Du hag a godhas wàr an dor. Yma an Nadelyk ow tos, hag in dedhyow cot ha yêyn an gwâv yth on ny temptys traweythyow dhe eva re. Yma govenek dhybm na wra den vÿth a’m goslowysy medhowy an mis-ma, trebuchya ha pystyga y honen.