© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma an ger carol kefys in Gerva an Kernowek Coth, le mayth ywa styrys avell chorus, ger Latyn usy ow mênya ‘bagas a ganoryon hag a dhauncyoryon.’ Yma Lhuyd ow ry an verb Kernowek carolly ‘to dance’. Carol yw ger Frynkek a veu drës aberth in Sowsnek Cres ha wosa hedna benthygys gans an Kernowek. Wostallath styr an ger carol o ‘dauns kelgh’ pò ‘ring dance’. A les ywa fatell vedha an hanow ‘Giants’ Carol’ ûsys i’n dedhyow coth in Sowsnek rag ‘Stonehenge.’ Grôndys wàr an hanow-na Carol an Gewry re beu comendys in Kernowek rag trailya ‘Stonehenge’. Yma Carol an Gewry ow qwil dhyn remembra an term Kernowek rag kelgh megalythek, hèn yw dauns meyn. In Sowsnek an ger ‘carol’ a dhysplêgyas dhe vênya cân a joy ha spessly cân lowen termyn an Nadelyk. Kynth yw an Nadelyk degol an carnacyon pò ‘incarnation’, nyns eus radn a’n carolyow tradycyonal ow compla genesygeth Crist in tyller vÿth, rag ensampyl ‘Here we come a-wassailing’ ha ‘the Twelve Days of Christmas.’ Nyns usy an gân ‘Deck the Halls with Holly’ ow compla genesygeth agan Savyour naneyl. ‘Deck the Halls’ yw cân Gembrek in y dhevedhyans hag yma an versyon Kembrek ow referrya dhe nos galan ‘nos Calan Genver,’ rag yth o hy cân rag an Vledhen Nowyth kyns ès Nadelyk. Ken Cân Nadelyk aswonys dâ yw ‘Good King Wenceslas’. Kyn nag yw an Nadelyk complys inhy, yma mencyon gwrÿs a dhegol Stefan, hèn yw an jëdh warlergh Nadelyk. Nyns o Wenceslas mytern saw dûk Bohêm. Ev a veu ledhys fâlslych gans y vroder hag yw consydrys sans ha martyr. Cân aral a vëdh clôwys yn fenowgh termyn an Nadelyk yw ‘Jingle bells, Jingle bells’. Y feu an gân-na dyllys rag an kensa prÿs i’n Massachusetts, Stâtys Udnys Ameryca in cres an nawnjegves cansvledhen. Ny’s teves an gân colm vÿth gans an Nadelyk bytegyns rag y feu hy screfys rag Jorna an Grassans pò ‘Thanksgiving.’ An carolyow usy ow pertainya dhe dhegol an enesygeth yw hympnys Nadelyk in gwiryoneth. Radn a’n hympnys-na in Sowsnek a veu trailys dhyworth tavosow erel, rag ensampyl ‘Silent night’ trailys dhyworth Jerman ha ‘Come all you faithful’ dhyworth Latyn. Wàr an tenewen aral radn a’n hympnys Nadelyk in Sowsnek re beu trailys dhe Gernowek, rag ensampyl ‘Hark the herald angels sing’ in Kernowek yw Clôw, canasow nev a gan, ha ‘Once in royal David’s city’ yw Kyns in cyta Davyth rial. A les dhe Gernowyon yw carol Nadelyk aswonys der an kensa lînen avell ‘The holly bears a berry as white as the milk’. Y feu geryow ha melody an carol-na recordys in bledhydnyow avarr an ugansves cansvledhen dhyworth Tomas Beard, Lanwenap. An gân re beu trailys dhe Gernowek hag ot an kensa gwers ha’n wers dewetha.


Greun glas eus dhe’n kelyn, mar wynn avell rew,

ha denythys yw Jesus, an unn Vab a Dhuw.

Ha Jesu yw Savyour dhyn, a’gan prenas der y woos

ha’n gelynen yw an kensa ow tevy i’n coos.


Greun rudh eus dhe’n kelyn, mar rudh avell ros,

ha das-serhys yw Jesus, ha fethys an nos.

Ha Jesu yw Savyour dhyn, a’gan prenas der y woos

ha’n gelynen yw an kensa ow tevy i’n coos.