© 2016 Nicholas Williams

Pùb gwir gwethys / All rights reserved


Clyckya obma ha goslowes / Click here to listen

Davyth ha Goliath 1.m4a


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Oryel Nacyonal Wordhen (the National Gallery of Ireland) yma pyctour spladn paintys i’n seytegves canvledhen gans Orazio Gentileschi henwys ‘Davyth ha Goliath’. Yma an paintyans ow tysqwedhes Davyth ow ladha an cowr gans y gledha y honen. Yth yw an whedhel Beyblek-na aswonys dhe genyver onen: fatell wrug Davyth an bugel deves yonk gans bùlien in mes a’y dowlbren gwil dhe gampyor hûjes brâs an Fylystînys codha dhe’n dor hag ena ev dhe drehy y bedn dhywarnodho. In gwiryoneth bytegyns nyns yw an whedhel sempel in fordh vëth oll. Yma an Beybel ow terivas dhyn fatell esa Davyth ow servya in palys Sawl mytern avell harpour kyns ès ev dhe ladha Goliath. Saw i’n whedhel pàn yw ledhys an Fylystîn cowrek, yma an mytern ow covyn pyw yw an den yonk yw an campweyth brâs gwrës ganso. Pelha in tyleryow erel i’n Beybel ny a red fatell wrug den gelwys Elhanan ladha Goliath adar Davyth. Kyns ès Davyth dhe gerdhes in mes dhe vetya gans Goliath ev a assayas caspows ha basnet Sawl. Ev a erviras bytegyns heb aga gwysca dre rêson nag o va ûsys dhedhans. Mes nyns yw an taclow-na campollys i’n Beybel avell hernes Sawl kepar ha caspows ûsys gans an Israelysy. Y o moy haval dhe daclow gwyskys gans an Grêkys coth. Pelha nyns o ûsadow an Ebrowyon settya campyor crev dhyworth pùb tenewen inter an dhew army rag ervira an dra intredhans. Ûsadow Grêk ha Keltek o hedna. Yth ywa kefys i’n epyk Godhalek hag in Ilyad an Grêkys, rag ensompel an omlath udnyk inter Hector hag Akyllês. Ha pelha i’n Ilyad an cothwas Nestor a lever fatell wrug ev omlath pàn o va pòr yonk warbydn Eurathalyon campyor. Kynth o an den-na uhel dres kynda Nestor a’n fethas hag a’n ladhas, whedhel usy ow qwil dhyn perthy cov a Dhavyth ow ladha Goliath. Res yw remembra nag o an Fylystînys dhyworth an keth stock avell an Israelysy. Y o a’n keth devedhyans avell an Grêkys ha’n Geltyon. Dre rêson a oll a’n poyntys-ma ha radn aral whath yma certan scolers ow predery nag o wharvedhyans Davyth ha Goliath whedhel Ebrow wostallath, saw an wharvedhyans dhe vos benthygys dhyworth an Grêkys. Me yw porposys dhe leverel neb tra moy ow tùchya Goliath, saw hèn yw lowr rag an seythen-ma.