© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag lies huny in agan dedhyow ny Pandôra yw hanow shoppa joweller. In gwiryoneth bytegyns yma an hanow Pandôra ow longya dhe venyn in mythologieth an Grêkys. Promêtheùs o Tîtan, hèn yw dhe styrya, ev dhe vos esel a’n dhuwow coth esa i’n ebron kyns ès duwow Olympùs. Herwyth an whedhel Promêtheùs a wrug formya mab den, kyn whrug ev cafos gweres dhyworth Athêna, duwes Olympyan. Mebyon tus o kerys gans Promêtheùs rag ev o aga gwrior. Pelha Promêtheùs a dùllas Jûbyter (Zews dhe’n Grêkys) ow tùchya an mater a offrydnow rës dhe’n dhuwow. Dre rêson a’n tùll-na pobel an bÿs a ylly gwetha dhodhans aga honen an welha radn a bùb best sacryfies ha ny vedha res dhodhans ma’s offra an eskern dhe’n dhuwow. Jûbyter a veu mar serrys der an cast gwrës orto gans Promêtheùs, may whrug ev ervira gwetha an ro a dan dhodho y honen, heb alowa dhe vebyon tus y gafos. Promêtheùs bytegyns in dadn gel a ladras tan dhyworth an dhuwow ha’y dry dhe’n dor ha’y ry dhe vab den. Rag pùnyshya Promêtheùs rag an secùnd tùll-na Jûbyter a dhesmygyas venjans wàr bobel an norvÿs. Jûbyter a ros dhe dus an bÿs mollath uthyk a vydna shyndya oll aga bêwnans. An vollath-na o benyn. Hy a veu gwrës in mes a dhowr ha pry gans Vùlcan, gov an dhuwow; Vênùs pò Afrodîte a ros tecter ha grâss dhedhy; Athêna a ros dyllas fin dhedhy hag a’s dyscas in oll creftow an chy. Wàr an dyweth Merher, messejer an dhuwow, a worras in hy brèst sleyneth ha gowegneth. An venyn a veu gelwys Pandôra, hanow usy ow styrya ‘oll an royow.’ Pandôra o an kensa benyn bythqweth a veu. Jûbyter a’s danvonas dhe Epymêtheùs, broder Promêtheùs. Epymêtheùs o hegol dres ehen. Ev a ancovas fatell warnyas Promêtheùs dhodho na wrella ev nefra recêva tra vëth dhyworth duwow Olympùs. Dre rêson Pandôra dhe vos mar sêmly bytegyns Epymêtheùs a’s wolcùbmas ha’y hemeres yn gwreg. Avell argovrow pò ‘dowry’ Pandôra a’s teva seth brâs (yth yw an seth-na gelwys ‘box’ yn fenowgh, saw nyns yw ewn an trailyans-na). Yth o kelys in seth Pandôra oll anken an bÿs—clevejow, nown, strîf ha gwerryans. Pàn egoras Pandôra hy seth, oll an re-na a neyjyas in mes hag ymowns y ow plâgya mab den bys i’n present termyn. Saw yth esa neppëth ow remainya orth goles an seth—hèn o govenek, an udn dra a ylly lehe mysery mab den. Nyns o Jûbyter dewedhys gans Promêtheùs y honen naneyl. Ev a dhampnyas Promêtheùs dhe vos kelmys wàr garrek in Menydhyow Caucas. Kenyver jorna y whre dos bys dhodho er scruthus ha’n er a sqwardya y avy in mes anodho. Saw dres nos y avy a wre tevy arta may halla an edhen uthyk dos an nessa dëdh rag devôrya arta y avy in mes a’y gorf. Lies oos a bassyas kyns ès tas an dhuwow dhe dhyserry. Wàr an dyweth Jùbyter a alowas dh’y vab Hercùlês mos ha ladha an er. Indelha Promêtheùs a veu delyfrys.