© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma gerva Kernowek in dornscrif Bilbao. An dornscrif-na a veu darbarys gans Jowan Tonkyn ha Wella Gwavas. I’n erva yma dew lavar usy ow qwil mencyon a’n vyternes: Mos dha’n mor in servys an Vyternes ha Ma dha vy trial in cort an Vyternes. An vyternes ena yw Ana, neb a dhalathas rainya i’n vledhen mil seyth cans dew. Ana o myrgh an Secùnd Jamys hag a’y kensa gwreg Ana Hyde. Ana Myternes o Protestant kepar ha’y mabm. Hy gour ty o Jory, pensevyk Denmark. Ana a veu myternes pàn verwys an tressa Wella, gour gwedhow Maria, whor Ana. Ana ha’y gour a whelas provia er pò êres neb a ylly eryta an gùrun. Kyn feu Ana gans flogh seytek treveth, ny vêwas onen vëth a’y flehes ha hy a verwys heb issew. Nyns o hy ma’s naw ha dew ugans bloodh pàn verwys hy. Y wharva lies tra in rain Ana. Onen anodhans o an udnyans a Scotlond dhe Bow an Sowson dhe wil Breten Veur. Udn vledhen kyns ès Ana dhe vos gwrës myternes, Seneth Pow an Sowson a bassyas an Act a Restryans (‘the Act of Settlement’). An laha-na a lettyas pùb dieskynyas pò ‘descendant’ a’n Kensa Charlys dhe vos mytern pò myternes Breten Veur avês dhe Ana hy honen. An gùrun o dyfednys dhe oll an dhieskynysy erel, dre rêson y dhe vos Catholygyon. Herwyth an act, Sofia a Hanôver a vedha myternes warlergh Ana. Sofia o Protestant. Hy a veu genys in secùnd qwarter an seytegves cansvledhen. Hy mabm o Elysabet Stûart, myrgh an Kensa Jamys a Bow an Sowson (an Wheffes Jamys in Scotlond). Tas Sofia o Frederyk Palatynât. Sofia a devys in bàn i’n Iseltiryow. Hy a dhemedhas Ernst Augùstùs, pensevyk in North a Jermany. Wosa whegh warn ugans bledhen a varyach, Ernst Augùstùs a veu gwrës an kensa Dôwysyas pò ‘Elector’ a Hanôver, ha Sofia ytho y feu Dôwysyades. Sofia o pòr skentyl. Onen a’y hothmans brâs o Gottfried Leibniz, fylosofer ha calcor. Sofia a studhyas scrifow fylosofers erel hy oos, spessly Spinoza ha Descartes. Hy a gemeras part brâs kefrÿs in byldyans an palys in Hanôver ha’y lowarthow spladn. Pàn veu Sofia declarys dhe vos an nessa monark a Vreten Veur, hy o moy ès seyth deg bloodh. Ana Myternes a verwys in mis Est a’n vledhen mil seyth cans ha peswardhek. Sofia bytegyns o marow solabrÿs rag hy a verwys in mis Metheven an keth bledhen. Rag hedna kensa mab Sofia, Jory Dôwysyas Hanôver a veu gwrës mytern Breten Veur. Ev a veu gwrës an Kensa Jory a Vreten Veur. Indelha y talathas teylu rial Hanôver, neb a dhuryas bys in mernans Vyctorya orth dallath an ugansves cansvledhen.