© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An kensa dëdh a vis Merth yw Degol Dewy, sans tasek Kembra; an pympes dëdh a vis Merth yw Degol Pyran, sans tasek Kernow ha’n seytegves dëdh yw Degol Padryk, sans tasek Wordhen. Pùbonen anodhans a veu genys i’n enesow-ma ha dre lycklod in Breten Veur hy honen. Y leveryr fatell verwys Dewy Sans an kensa dëdh a vis Merth pymp cans êth deg naw. Padryk a vewas in dyweth an pympes cansvledhen. Ev a veu genys in Breten Veur hag a veu drës dhe Wordhen avell keth. Ev a a veu fries ha dewheles dhe Wordhen rag progeth an Cristoneth dh’y fobel. Peran yw an sans anodhans yw an lyha godhvedhys adro dhodho. Dell hevell ev a vewas avarr i’n wheffes cansvledhen. Y feu whedhel y vêwnans screfys i’n peswardhegves cansvledhen. Hèn yw dhe styrya bos an istory screfys a’y vêwnans moy ogas dh’agan dedhyow ny ès dhe dhedhyow an sans y honen. Scant ny yllyn ny cresy bos pùptra ino gwir. Yth yw leverys in y vêwnans fatell dheuth Peran dhyworth Wordhen, hag ytho y hanow i’n dallath dhe vos Ciarán. Yethoryon Geltek a wor bytegyns na yll colm vëth bos inter an dhew hanow Ciarán ha Peran. Canon Doble, scoler brâs sens Kernow, a gresy fatell o Peran Kembro adar Godhal, ha’y das dhe vos pryns in Morganok. Mabm Peran o Godhales martesen. Peran a spênas dedhyow y yowynkneth in Soth a Gembra. I’n dedhyow coth yth esa chapel sacrys dhe Peran in Kerdydh. Mars eus fùndyans istorek vëth dhe dhedhyow a’n dyvers degolyow-ma, Dewy, Peran ha Padryk, aga thry a verwys in mis Merth. Y oll a vewas in Breten Veur in pympes pò an wheffes cansvledhen; i’n termyn-na Oos Tobm an Romans o passys, hag yth esa an awel ow yêynhe. Res yw fatell vedha an gwâvow sevur lowr. Agan try sans a spênas aga bêwnans in penys hag in asperder ha ny a yll soposya y oll dhe vos tryugans bloodh dhe’n lyha pàn wrussons merwel, hèn yw pàn êns y gwadnhës dre henys. Nyns ywa skyla rag marth ytho y oll dhe verwel i’n gwaynten wosa cruelta an gwâv. Mars yw gwir agan desmyk, yma va ow styra prag y fëdh degol kenyver sans dhe godha i’n keth mis.