© 2016 Nicholas Williams

Pùb gwir gwethys / All rights reserved


Clyckya obma ha goslowes / Click here to listen

Salamander.m4a


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Salamandrys yw dywelvenegyon pò amphibians, goos nessa an pedrevanas dowr pò newts. Kepar ha’n dhywelvenegyon erel yma an salamander tregys ogas dhe dhowr, rag yma hy ow tedhwy hy oyow in dowr hag y fÿdh an re yonk ow tallath aga bêwnans ena. Salamandrys yw kefys in oll brâstir Ewrop saw wàr an brâstir y honen yma an salamander in peryl dhyworth fùngùs in certan tyleryow. An salamander kebmyn menowgh lowr yw gelwys salamander tan pò fire salamander dre rêson a’n merkyow wàr y gorf: an best yw du saw yma lînednow pò splattys a lyw melen pò melenrudh wàr y grohen. Yma meur a fâls-crejyansow kelmys gans an salamander. Herwyth crejyans Yêdhewon an dedhyow coth y fedha an salamander formys dre lesky tan i’n keth tyller dres seyth bledhen. Ha whath a pe nebonen ùntys gans goos an salamander, na alsa ev bos pystygys dre dan. Arystotel ha Plyny kefrÿs a lever fatell yw an salamander abyl dhe dhyfudhy tan dre yêynder y gorf. An salamander o arweth personek an Kensa Francys, mytern Frynk. Y salamander ev a vedha dysqwedhys pùpprÿs avell dragon vian, cùryn wàr hy fedn, ha hy in cres flabmow a dan oll adro dhedhy. Nyns yw an salamander kefys in Breten Veur nag in Wordhen naneyl. Rag hedna in Wordhen an fâls-crejyansow derivys adro dhe’n salamander re beu ascrîbys dhe’n peswar paw pò lizard. Best aral yn tien yw hedna. An peswar paw yw cramvil pò reptile. Sëgh yw crohen an peswar paw, adar glëb kepar ha crohen an salamander. Saw yma whedhlow derivys adro dhe’n peswar paw in Wordhen usy ow longya in gwir dhe’n salamander. Me a glôwas dhyworth Godhalegor in Conteth Galway adro dhe dhew ugans bledhen alebma a vyrtu marthys an peswar paw. Mar teu nebonen ha cachya peswar paw, an den-na a leverys dhybm, ha rùttya y davas naw gweyth orth torr an best, nena y fedha sawment in y davas warbydn lesky ha tan. An peswar paw yw pòr vethek hag yma hy ow coheles syght mab den. Ytho pòr gales yw cafos onen anodhans i’n kensa le. An whedhel adro dhe’n sawment warbydn tan bytegyns, hedna a dheuth dhyworth an fâls-crejyansow derivys adro dhe’n salamander in tiryow wàr vrastir Ewrop.