© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw an hanow Tommas kefys i’n Ordinalia hag in Tregear. In Bêwnans Ke an sans yw gelwys Sen Tommas. Yth yw an form Tobmas kefys in dornscrif Bilbao, le mayth eson ny ow redya an lavar-ma: Me a yll mos der an hôl country gen Tobmas pîbor hay dhen. An hanow Tommas, Tobmas a dheu dhyworth an form Latyn a’n hanow Aramek Tawma, ger usy ow styrya gevel ‘twin’. Yth yw reportys i’n ugansves chaptra a Awayl Jowan fatell usy Jesu warlergh y dhasserghyans owth omdhysqwedhes dhe’n dhyskyblyon. An awayl a lever: Saw nyns esa Tobmas (henwys an Gevel), onen an dewdhek, gansans pàn dheuth Jesu. Rag hedna an dyscyplys erel a leverys dhodho, Ny re welas an Arlùth.” Saw ev a leverys dhedhans, Marnas me a wel in y dhêwla pryk an kentrow, ha settya ow bës in pryk an kentrow, ha gorra ow leuv in y denewen, nefra ny vanaf cresy.” I’n gwary Kernowek Resurrexio Domini yth yw an darn cot-na moghhës yn frâs dhe wil whedhel ino y honen. Yma Jesu owth apperya dhe’n dhyskyblyon pàn nag yw Tobmas present. Tobmas a breder an dasserghyans dhe vos re dhâ dhe gresy hag ytho gowegneth. Rag hedna yma va ow tespîtya kenyver onen a’n dyscyplys usy ow cresy ino an eyl wosa y gela. Dhe Peder ev a lever:

A Peder, ty an nahas;

rag bos y bain mar ahas

dhis ny gresaf,

ha me ath pës, gas dha wow;

na whyla plauntya whedhlow

dell yth pesaf.

Ha dhe Androw ev a lever:

Androw, meur yw dha dhesîr

an dra-na, na yll bos gwir,

gul dhymm cryjy:

y vos in bàn dasserhys

ha dhen bës arta trailys.

Assos gocky!

Dhe Cleopas ha’y goweth neb a welas Crist wàr an fordh dhe Emaws Tobmas a lever: nyns owgh lemen gowygyon. Moy dyscortes whath yw Tobmas dhe Maria Magdalena hag yma va worth hy braggya. Mar teu hy ha pêsya gans hy gockyneth adro dhe’n dasserghyans, ev a vydn terry hy fedn hy. Warlergh hedna i’n gwary Jesu a dhysqweth y honen dhe Tobmas hag ev yw perswâdys nag yw gow an dasserghyans. Pelha ev a bÿs Jesu dhe ava dhodho. Wàr an dyweth, kyns ès ascendya dhe’n nev, Crist a lever dhe Tobmas:

Tommas, ty â dhe Eynda

hag ena pregoth a wra

in ow hanow;

ha gwra dhis moy servyjy.

In wlas-na ow leungrysy

tus yw tanow.

Apert yw fatell wodhya auctour Resurrexio Domini a’n tradycyon ow tùchya Sen Tobmas. Herwyth an tradycyon-na Tobmas a viajyas in mes a’n Empîr Roman hag a dhrehedhas Cost Malabar i’n Soth-West a Eynda, Kerala hedhyw. Ev a fùndyas lies eglos i’n côstys-na hag i’n vledhen agan Arlùth dew ha hanter-cans, y feu va mertherys in Mylapore ogas dhe Chennai (Madras kyns lebmyn). Yma rêsons dâ dhe gresy nag yw gwir an whedhel-na, saw ny yll bos denehys fatell eus lies Cristyon i’n Kerala. Kynth yns y rydnys inter moy ès pymp kemeneth dyffrans, ymowns y oll owth agria fatell veu aga eglosyow growndys wostallath gans Sen Tobmas abostel.