© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma bardhonek aswonys dâ in Godhalek coth usy ow tallath gans an geryow Cettemain cain ree ‘mis Mê yw sêson teg.’ Ow hothman tremenys, Pendescador James Carney, a gresy an bardhonek-na dhe longya dhe dhyweth an wheffes cansvledhen. Hèn yw dhe styrya an prydyth dhe dhesmygy an bardhonek adro dhe vledhen agan Arlùth pymp cans naw deg. Carney a gresy hedna in part dre rêson an bardhonek dhe vos in form akenek adar syllabednek. Nyns yw lînen a’n brydydhieth grôndys wàr an nùmber a sylabednow inhy adar wàr an nùmber a boslevow pò stresses. Tôkyn yw hedna an bardhonek dhe vos pòr goth. An kensa ger i’n kensa lînen yw Cettemain ‘mis Mê.’ An ger cetamain yw goos nessa an ger Cyntefin ‘mis Mê’ in Kembrek Cres. Yma an henwyn cetamain ha kyntefin aga dew ow tos dhyworth form Geltek *kintu-samino- ‘kensa mis an hâv.’ Rag an Geltyon goth mis in cres an hâv o *medio-samino- pò *medio-samo-. Yma an furvyow-na ow ry Metheven in Kernowek, Mehefin in Kembrek ha Meitheamh in Godhalek. Saw gesowgh ny dhe dhewheles dhe’n bardhonek. Onen a’n taclow moyha a les dhybmo vy adro dhodho yw an losowen eilestar dhe vos campollys ino hag y leveryr hy dhe vos a lyw an owr. Hèn yw an kensa mencyon dhe’n losowen in oll lien an Godhalek. Eilestar in Godhalek Coth yw seileastramfeileastram in Godhalek arnowyth, ha hanow Sowsnek an losowen yw ‘wild iris’ pò ‘yellow flag’. Yma an hanow Kernowek elestren ‘wild iris’ dhe weles in Gerva an Kernowek Coth hag apert yw Godhalek eilestar ha Kernowek elestren dhe vos an keth ger. Nyns yw godhvedhys usy an dhew hanow elestren in hag eilestar ow tos dhyworth an keth gwredhen, poken a veu an eyl benthygys dhyworth y gela. Plans teg yw an elestren, poran kepar hag iris an lowarthor, saw melen yw an flour adar pùrpùr. Y fëdh elestren ow tevy ryb ryvers, goverow ha pollow, hag i’n tyleryow glëb erel. An losoworyon modern a lever dhyn fatell vëdh flour an elestren gwelys dhia vis Metheven bys in mis Êst. Pàn esen vy i’n West a Wordhen seythen alebma, hèn yw in cres mis Metheven, yth esa an elestren ow plejyowa dres oll an pow. Coynt ywa ytho an elestren velen dhe vos campollys avell flour a vis Mê in bardhonek an Godhalek coth. Res yw perthy cov heb mar fatell esa Gwydhyly an dedhyow coth owth ûsya dedhyador dyffrans dhyworthyn ny hag yth o moy adhewedhes i’n vledhen an mîsyow ragthans y ès dell yns ragon ny.