© 2015 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n dedhyow warlergh Secùnd Gwerryans an Bës yth o leth consydrys boos pòr dhâ rag flehes yonk, dre rêson an calcyùm ino dhe grefhe eskern ha dens in flehes esa ow tevy. An governans ytho a dhros ajy leth heb còst rag kenyver flogh in scolyow elvednek. I’n vledhen mil naw cans seyth deg onen, pàn o hy an menyster rag adhyscas, Margaret Thatcher a dhefendyas dhe ves leth rag scolflehes. Hedna a dhendylas rygthy an les’hanow Milk-snatcher Thatcher. Hy a omglôwas abyl dhe wil hedna martesen in part drefen medhygyon i’n dedhyow-na ny dhe gresy leth ha taclow gwrës a leth kepar hag amanyn ha keus dhe encressya tewder. Pella y a gresy leth hag amanyn dhe vos drog rag yêhes mab den dre rêson bos meur a golesterol inhans. Rag hedna y fedha margarîn avauncys avell an dêwys yagh rag tus leundevys. Res yw avowa bytegyns nag yw an colm inter colesterol in boos ha cleves colon mar sempel dell yw leverys traweythyow. Yth yw udn dra certan: an tybyans nag yw leth na sosten lêty dâ rag an yêhes a via coynt dh’agan hendasow. Apert an Geltyon Goth dhe wil vry a vuhas hag a leth. An ger rag maw in Godhalek yw buachaill, hag yma hedna ow styrya ‘hedna usy ow kemeres with a’n buhas’. Buachaill yw goos nessa an ger Kernowek bugel ‘shepherd’, rag wostallath bugel o ‘cowherd’, adar ‘sheep-herd’. Pàn wrella an Godhalegor côwsel adro dhe’n fordh, ev a lever bóthar, ha styr an ger-na yw ‘le may fëdh drîvys an buhas’. Dell hevel yma colm inter bóthar in Godhalek ha bownder in Kernowek. Yma lies ger aral i’n tavosow Keltek usy ow qwil dhyn cresy fatell vedha leth ha buhas meur-gerys gans an Geltyon Goth. An Geltyon martesen a’s teva an tybyans ewn adro dhe leth. Y feu whythrans gwrës agensow i’n Stâtys Udnys hag in Swêden ow tysqwedhes fatell yw leth a brow rag an yêhes. Yma leth ow qwetha an corf warbydn cleves shùgra pò diabetes. Mar teu nebonen hag eva meur a leth, ev a yll lehe y jauns a sùffra gans cleves shùgra adro dhe dryugans an cans. Ny vynsa agan hendasow gwil marthùjyon vëth leth ha sosten lêty dhe vos dâ rag yêhes kenyver onen.