© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Kel-zôologieth pò ‘cryptozoology’ yw fug-sciens usy ow whelas prevy an exystens a vestas nag yw destys ma’s in whedhlow an bobel. Yma genesygyon lies pow ow cresy bos fug-vestas i’n bÿs. Sompel dâ yw an Yety pò Bùcka an Ergh. Yth yw bosva an best-na growndys wàr grejyans trevesygon menydhyow Hymalaya. Dre lycklod nyns yw an Yety in part ma’s ors pò sym gwyls neb a veu gwelys i’n pellder. Troos Brâs ‘Bigfoot’ pò Sasqwach yw fug-vil Ameryca North; ev yw kepar ha den blewek hag yma lies huny ow clêmya y dh’y weles. An grejyans in exystens Troos Brâs a dhalathas dell hevel, in whedhlow Amereyndan. In agan dedhyow ny pàn veu Troos Brâs gwelys, yn fenowgh nyns o an best in qwestyon ma’s tarosvan creatys dre dhesmygyans re hegol aga honen. Pelha radn a’n bestas gwelys a ylly bos styrys avell soudoryon neb a dhewhelys dhyworth Viet Nàm—ha shyndys aga brës yth esens y ow pêwa avell tus gwyls i’n cosow. Dre lycklod inwedh nyns o radn a’n gwelesygethow ma’s castys ha tùll dre dowl. In Ameryca Cres, spessly in Pwertô Rîcô, yma certan re ow cresy in best coynt henwys an chùpacabra pò ‘sugnor goos gyfras.’ Yma rew a spîkys keyn an best wàr nans hag yth hevel na veu an creatur aswonys yn tâ bys in bledhydnyow naw deg an ugansves cansvledhen. Yma radn ow cresy fatell veu exystens an best sordys dre fylm fug-lien sciensek a’n dedhyow-na. An fug-vestas complys genef bys lebmyn yw cresys dhe vêwa wàr tir sëgh. In cres Afryca yma an bobel ow cresy bos fug-vest i’n ryvers yw gelwys Mokele-Mbembé, hanow in tavas Lyngala, usy ow sygnyfia ‘hedna usy ow lettya resek an dowr’. Leverys yw an best dhe vos debror-erbys peswartrosek hag ev dhe vos in y semlant kepar ha cramvil pò ‘reptile.’ Smoth yw y grohen ha ny’n jeves ma’s udn dans. Nyns yw godhvedhys pandr’yw gwredhyow an grejyans, saw res yw compla fatell wrug whedhlow adro dhodho drehedhes Ewrop in very dallath an ugansves cansvledhen pàn esa lies huny ow tysqwedhes les in gorscantegyon pò ‘dinosaurs.’ Yma hedna worth agan lêdya dhe fug-vest an enesow-ma: Euthvil Logh Nysh. Herwyth an fotografow moyha cler yth yw an euthvil kepar ha serpont dowr. Convedhys yw i’n jëdh hedhyw, bytegyns, fatell veu contrefeytys meur a’n pyctours. Kyn whrug sciencydhyon whythra an mater yn town, ny wrussons bythqweth cafos tra vëth a’n euthvil i’n lydn; ny veu kefys onen vëth a’y eskern kyn fe. In gwiryoneth an euthvil yw creacyon a dhesmygyans poblow an Uheldiryow. In oll an bÿs Godhalek in Scotlond hag in Wordhen yth esa an bobel ow cresy margh dowr pò serpont dowr dhe vos tregys in kenyver lydn brâs i’n dhew bow. Logh Nysh yw an lydn brâssa in Scotlond ha nyns yw marth ytho fatell esa an bobel ow cresy bos euthvil tregys ino. Res yw dhyn avowa bytegyns fatell yw Euthvil Logh Nysh creatur a vythologieth Geltek. Gwir-vest nyns ywa màn.