© 2016 Nicholas Williams

Pùb gwir gwethys / All rights reserved


Clyckya obma ha goslowes / Click here to listen

Lûcy Sans.m4a


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth o Lûcy Sans gwerhes yonk neb a veu mertherys in Syracûs in Sycyly in dadn Dioclêcyan, emprour Rom, i’n peswora cansvledhen. Yth yw enys in Mor Carybean henwys wàr hy lergh, Sen Lûcya. Hy yw chif sanses Swêden kefrÿs, ha’y degol yw an tredhegves dëdh a vis Kevardhu. I’n dedhyador coth yth o an jorna-na howlsav an gwâv, an jëdh cot’ha in oll an vledhen. Dre rêson Swêden dhe vos pell lowr dhe’n North, y fëdh dedhyow an gwâv pòr got i’n pow-na. Rag hedna an bobel a wre solempnya degol Lûcy avell dëdh golow ha gwres hag y ow meras in rag dhe’n gwainten ha’n dedhyow hir. In Swêden degol Lûcy yw dëdh brâs rag an flehes. Pùb bledhen yth yw udn vowes dôwysys rag kemeres radn Lûcy. Hy a vëdh gwyskys in pows wydn hag a dheg cùrun a gantolyow wàr hy fedn. I’n dedhyow passys y fedha an cantolyow gwrës a gor hag y ow flabmya in gwir. Dre rêson a’n peryl brâs a dan gwall hag a bystyk dhe Lûcy, hedhyw i’n jëdh golow an cantolyow yw provies dre bîlyow pò ‘batteries’. Gordhuwher an tredhegves dëdh y fëdh golowys an chy dyfudhys hag otta Lûcy ow tos aberth, hy gwyskys in gwydn warbarth gans hy mowysy servya, y gwyskys in dyllas gwydn kefrÿs, ha gans hy gwesyon vian, gwyskys in gwydn inwedh, pykernow uhel wàr aga fedn hag in aga dorn gwelen afînys gans stêren wàr hy thop. Pàn vo Lûcy ha’y mêny owth entra, y fëdh oll an flehes ow cana an gân specyal rag degol Lûcy, ha geryow an gân-na yw aswonys gans pùbonen in Swêden. Avell radn a’n solempnytas y fëdh debrys câkys bian wheg, saworys gans safern. Yma an câkys-na in form a gathas gyllys in gron ha fyges howl pò ‘raisins’ yw aga lagasow. Kynth yw degol Lûcy kelmys gans an sanses a veu mertherys in Empîr Roman, yma tradycyon aral in Swêden fatell o Lûcy aral kensa gwre’ty Adam. Y fedha derivys an Lûcy-na dhe gowethya gans an Jowl ha’y flehes iffarnak hy dhe vos dywel. Yth hevel ytho fatell esa elementys pagan ow longya dhe solempnytas Lûcy. Degol Lûcy ha Golowan ‘Midsummer’ yw an dhew dradycyon moyha a bris in gonesygeth an bobel in Swêden. Apert yw ytho pana vrâs o styr tewolgow ha golow, yêynder ha gwres in mesk tiogow ha tiogesow Swêden i’n termyn eus passys.