© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n vledhen mil eth cans seyth deg seyth Henry Jenner a dhemedhas Kitty Lee Rawlings. Hy o screfores a novelys hag a lyfrow adro dhe lymnans. Jacobît o Jenner, hèn yw dhe styrya ev dhe scodhya an Stewartys. Ev o esel a Ordyr an Rosen Wydn, cowethas a bobel a gresy nag o gwir dhe deylu Hanover wàr dron an Wlascor Udnys. Dell hevel y feu Jenner presentys dhe Vyctorya Myternes saw nyns o hy pës dâ côwsel orto dre rêson ev dhe gresy nag o lafyl dhedhy bos myternes. Jenner a gresy inwedh y cothfia dhe’n mytern bos galosek i’n wlascor kyns ès symbol yn sempel. Pàn wrug Jenner omdedna dhyworth y ober in Hendrajy Bretednek ev a dheuth dhe drega in Hayl rag hèn o tre genesygeth y wreg. Ena ev a vetyas gans den yonca agesso y honen, Robert Morton Nance hag y aga dew a wrug kesobery wàr an tavas Kernowek. Jenner a veu dêwysys lyfror Lyverjy Morrap hag a veu presydent rag termyn a Instytûcyon Rial Kernow. Esel o Jenner a Eglos Pow an Sowson dres oll y vêwnans saw udn vledhen dhyrag y vernans in mil naw cans try deg peswar ev a veu degemerys aberth i’n Eglos Roman Catholyk. Pan verwys ev y feu va va encledhys in corflan Eglos Ewny Lalanta. Jenner a leverys adro dhodho y honen: ‘Towl oll ow bêwnans re beu dhe wil dhe’n Gernowyon convedhes aga ertach Kernowek.’ Kynth o Jenner mentenour fest dasweythus pò reactionary in y bolytygieth, y savla tro ha’n tavas o arnowyth hag avauncys. In y dhornlyver, Handbook of the Cornish Language, yma va ow whelas kemeres an tavas in bàn in le may whrug hy gorfedna. Ytho yth yw y ehen ev a Gernowek nessa dhe Gernowek Dhewedhes ès dhe Gernowek Cres. In y dhornlyver Jenner a wrug growndya y versyon a’n yêth wàr an descrypcyon rës gans Edward Lhuyd in dallath an êtegves cansvledhen. Rag ensampyl yma va owth alowa pedn, gwydn, cabm ha tobm in le pen, gwyn cam ha tom. Pelha nyns yw poos ganso screfa merkyow a-ugh an lytherow rag dysqwedhes aga hirder. Dre vrâs apert yw dhyworth an Handbook Jenner dhe vos yethor skentyl ha’y spellyans dhe vos pòr dhâ rag an tavas daswewys. Pàn verwys Jenner, y feu y dyller avell hùmbrynkyas a’n dasserghyans kemerys in bàn gans Morton Nance. Gwell o gans Nance mos wàr dhelergh dhe’n Osow Cres rag fùndacyon an tavas. Yma lies huny ow cresy nag o fur an ervirans-na.