© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Caradar in Raglavar Kernewek Sempelhës a’n vledhen mil naw cans try deg naw a scrif indelma: ‘Ny dheu tavas bÿth yn few heb y gêwsel. Dhe’m tybyans vy, gwell yw pymp mynysen a gows ès pymp eur a redya. Orth y gêwsel y teu Kernowek yn few desempys. Ytho yma gwaityans genef y whra pùb studhyor a’n lyver-ma…whilas kêwsel kyns ès scrifa.’ Gesowgh ny dhe leverel an gwiryoneth: pòr gales yw côwsel Kernowek pàn nag eus cowsor genesyk vëth genen a yllyn ny gwil wàr y lergh. Milgweyth moy êsy ywa screfa ha redya Kernowek ages y glappya. Dell hevel, yth esa Robert Morton Nance y honen in mesk an bobel na wre assaya côwsel an tavas. Caradar ha Talek a veu degemerys avell berdh in Gorseth an vledhen mil naw cans try deg dew, ha pàn esens oll owth omwysca rag an solempnyta Mordon a wrug aga fesy aga dew na wrellens côwsel Kernowek intredhans aga honen rag dowt y dhe vexya pobel erel. Orth ocasyon aral Mordon a ros avell rêson rag y stauns i’n negys-ma y opynyon na ylly an tavas bos gwethys dhyworth dystrùcsyon mar ny via studhys yn town. Nyns o styryans Mordon gwiryon yn tien. An gwiryoneth yw na ylly Mordon omhevelly dhe Dalek ha dhe Garadar ow kestalkya in Kernowek. Ny’n jeva ev an teythy dh’y wil. I’n gwetha prës yth hevel fatell wre Kernowegoryon warlergh Mordon pàn o va Bardh Meur. Dres moy ès deg bledhen warn ugans y a wre lymytya aga ûsyans a’n tavas dhe redya ha dhe screfa. Aswonys o dhybm i’n bledhydnyow try ugans descadoryon a wre desky an tavas dhe bobel erel saw na wrug bythqweth sensy kescows i’n tavas. In Gorseth Kernow an vledhen mil naw cans whegh deg seyth, yth esen vy ow kerdhes i’n processyon adhelergh dhe dhen an baner ha me ow whilas kestalkya in Kernowek gans an den rybof. Den an baner a drailyas tro ha me hag a leverys ‘Don’t talk in the procession!’ I’n prës-na me a veu mar dùllys na wrug vy dewheles dhe’n Orseth bys pedn deg bledhen warn ugans. Res yw avowa bytegyns fatell yw gwelhës yn frâs nans yw termyn an mater a gôwsel an tavas kyns ès y redya yn udnyk. Res yw dhyn aswon meur rass dhe bobel kepar ha Rod Lyon, Mick Paynter, Jenefer Lowe, Matthew ap Dewy ha lies huny aral rag an amendyans. Dell lever an lavar coth Godhalek: Beatha teanga a labhairt ‘Bêwnans tavas y gôwsel.’