© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma an ger keser ‘hail’ kefys in Kernowek Coth. Pelha Pryce a lever: ergh, rew, gwyns ha clehy ha keser hag yma Lhuyd ow screfa: Yma ow cul keser ‘It is hailing’. Yma keser ow tallath avell banahow dowr in cloudys hager-awel. Y fëdh an banahow whethys in bàn gans gwynsow crev ha pàn vowns ow terevel, ymowns y ow cùntell moy a wyscosow a rew. Indella udn geseren pò ‘hailstone’ a yll bos brâs lowr. In gwir in certan tyleryow i’n bës men keser a yll bos moy ès dew buns in poster hag adro dhe eth mêsva adreus. Pàn wrello an keserednow gweskel an dor, y a yll bos ow codha moy ès cans mildir i’n eur. Keser a yll gwil meur a dhamach, ow shyndya airednow in air ha wàr an dor hag ow myshevya kerry tan ha byldyansow. An arnew lacka martesen a yll bos gwrës gans keser yw dhe drevas ow tevy i’n gwelyow. Yma keser ow ladha pobel kefrës. Yma tyller dianeth in North a Eynda henwys Roopkund. I’n cres an gansvledhen dhewetha warden forest ena a wrug dyscudha neb tra uthyk. In valy bian neb whêtek mil dros’hës a-ugh level an mor yth esa lydn rewys leun a gorfow eskern. Y feu an negys whythrys yn town in dallath an gansvledhen-ma hag apert yw lebmyn an pëth a wharva. Oll an dus varow a veu ledhys cansow a vledhydnyow alebma dre vomednow dhe’n pedn ha dhe’n dhywscoth gwrës gans taclow rônd ha dylym neb o mar vrâs avell pelyow crycket. Adro dhe vledhen agan Arlùth eth ha hantercans yth esa bagas a brierynas ow mos dres an valy-ma pàn vowns y kechys in hager-awel a geser, ha’n keser a ladhas kettep onen anodhans. Hager-awel a geser a wharva in cres Pow an Sowson hag in Ÿst-Anglya in mis Est mil eth cans peswar deg ha try. Uthyk o an damach a wrug hy ha’n keser in tyleryow a dhrehedhas downder wàr an dor a beswar tros’hës ha naw mêsva. Mar vrâs o an damach gwrës gans an hager-awel may feu formys cowethas surheans rag gwil gweres dhe bobel in hager-awellow a’n sort-na i’n dedhyow esa ow tos. Hanow an gowethas o The General Hail Insurance Company. Aswonys veu moy adhewedhes avell an Norwich Union, radn a Aviva in agan dedhyow ny.