© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Gawain yw onen a varhogyon an Tâbel Rônd. In Kembrek ev yw gelwys Gwalchmai hag yth hevel fatell dheuth an form Gawain dhyworth an hanow-na, martesen der an Bretonek. An hanow Gavin yw form a Gawain. Yma Gwalchmai ow styrya ‘Hôk a vis Me’, kynth usy nebes re ow predery an hanow dhe sygnyfia ‘Hôk an Gwastattir’. I’n tradycyon Kembrek Gwalchmai yw mab Gwyar, whor Arthùr, hag ytho noy an mytern y honen. Ev yw campollys in nebes textow Kembrek a’n Osow Cres, i’n whedhel Culhwch hag Olwen rag ensampel. Yma William Malmesbury i’n dhewdhegves cansvledhen ow kelwel Gwalchmai Walwen hag ev a lever fatell o va pensevyk Galloway i’n soth-west a Scotlond. Walwen a veu gorrys in mes a’y wlascor gans broder Hengystùs, chyften an Jûtas. Herwyth William Malmesbury y feu bedh Walwen kefys in Conteth Penvro in soth-west a Gembra, kyn nag yw godhvedhys ple ma bedh Arthùr Mytern. Yma part brâs gans Gawain in Istory Jeffry Menow, a veu screfys in dhewdhegves cansvledhen kefrÿs. Warlergh Jeffry Gawain êth gans Arthùr dhia Vreten dhe Vrâstir Ewrop rag omlath warbydn Lùcyùs emprour an Romans; hag yma va ow spêdya in batalyow ena. Pàn wrella Arthùr clôwes a draison Modred bytegyns, yma va ha’y varhogyon ow forsâkya aga viaj warbydn Lùcyùs hag ow tewheles dhe Vreten rag fetha an traitour. Ymowns y ow tira in Kynt, le may whra Modred ladha Augel mytern Scotlond, onen a varhogyon Arthùr, ha Gawain kefrës. Yma auctour an gwary Kernowek Bêwnans Ke ow sewya narracyon Jeffry yn stroth hag yth yw Gawain person a bris i’n gwary. Kyns ès Arthùr ha’y lu dhe dhepartya dhyworth Breten rag chalynjya Lùcyùs, y noy a lever:
Me, Syr Gawen
a vÿdh socour
Mytern Arthûr
in qwarel gwir
dres mor ha tir
yn serrys anwhek lowen.
Hag in Kynt, pàn wrella Modred ladha Augel ha Gawain, Arthùr a gry in mes, meur y anken:
Now Mytern Scotlond Augel
ha Syr Gawen yw marow.
Y o chif ow marhogyon.
A Dhuw, gohy ow holon
rag tristans ha galarow!
Y kefyr lies whedhel aral in dyvers tavosow ow tùchya Syr Gawain. Onen a’n whedhlow moyha a bris yw Syr Gawain ha’n Marhak Gwer, bardhonek hir in Sowsnek Cres. Me a vydn côwsel adro dhe hedna nessa seythen.