© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Richard Carew a veu genys in Pluw Anton ogas dhe’n Stert pò Torpoint i’n vledhen mil pymp cans hantercans ha pymp hag ev a veu deskys in Resohen. Carew a veu laghyas ha trailyor tavosow hag ev a drailyas lyfrow Italek ha Spaynek dhe Sowsnek. Y ober moyha a bris bytegyns yw Arwhythrans a Gernow ‘the Survey of Cornwall’ neb a veu dyllys i’n vledhen mil whegh cans ha dew. Y feu an lyver gorrys in mès moy ès unweyth warlergh hedna, an treveth dewetha a veu in cres an gansvledhen dhewetha pàn o F.E. Halliday an golegyth. Kyn nag eus meur a Gernowek gans Carew yma va ow ry derivas cot i’n lyver adro dhe’n tavas. Ena rag ensampyl ny a gav an lavar me ne vydna cowsa Sowsnek. In tyller aral yma va ow ry dhe’n redyor an lavar Trûrû, trueth yw, owth omdedna y’n jevÿth try rew. Hag ev ow côwsel adro dhe Bosvena pò Bodmin Carew a wra mencyon a Cort Hal Gavar. Hòn o cort desmygys yn tien saw tus yonk Bosvena a wre hy hampolla may hallens gwil ges a vaw nowyth devedhys dhe’n dre. Pàn welens y den yonk nag o y wysk yn compes, hèn o nag esa warnodho ma’s udn spor yn udnyk wàr y votas in le a dhew, pò mars o va heb grugys pò neb tra kepar, y a levery fatell o res dhodho omdhysqwedhes dhyrag Cort Hal Gavar. Hal Gavar yw tyller avês dhe’n dre hag yth o va leun a lisegow lenky pò quagmires. Ny ylly an den acûsys ma’s mos dhe’n hal dhe omlath gans dragon, dell vedha leverys dhodho, pò dhe gollenwel neppyth moy gocky whath. Kyn nag esa naneyl cort na dragon i’n hal, an den truan a vydna mos dy ha dre lycklod codha aberth in onen a’n tyleryow lisak glëb. Yma Carew owth addya fatell o hedna lavar coth in mesk pobel Bosvena ow tùchya den scubellak pò scruff: ev a dalvia bos drës dhyrag Cort Hal Gavar. Kynth usy Carew ow terivas an mater in Sowsnek, yth hevel fatell via hobma fordh dhâ ragon ny dhe gôwsel adro dhe nebonen dygempen. Ytho rag ‘he is very scruffy’ ny a yll leverel Ev a dalvia bos drës dhyrag Cort Hal Gavar. Martesen Kernowegoryon a alsa ûsya lavar a’n keth sort dhe gôwsel adro dhe venyn scubellak kefrÿs. I’n dedhyow-ma an kewerder polytyk pò ‘political correctness’ bytegyns gwell yw martesen sconya dhe leverel tra vëth a’n par-na.