© 2017 Nicholas Williams 

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording 

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Albion yw an hanow cotha rag an enys a Vreten Veur. Hanow Keltek ywa. Gwredhen an ger yw *alb- usy ow styrya ‘gwydn’, martesen ow referrya dhe’n âlsyow gwydn wàr an cost soth a Vreten Veur. Yma tus erel ow consydra y vos gwell convedhes an hanow avell ‘an bÿs golow, an bÿs a yll bos gwelys’ rag decernya inter an pow hewel wàr an eyl tu ha wàr y gela anown ‘the underworld’ in dadn an dor. Yma an styr a’n hanow Albion ow referrya dhe Vreten Veur yn tien ow turya in Frynkek, le may ma kefys an lavar perfide Albion ‘treacherous Britain’. Yth yw an geryow-na kefys in prynt rag an kensa prës dell hevel in dedhyow Whêldro Frynk. In Breten Veur hy honen dres an osow y feu an hanow Albion lymytys dhe’n radn north a’n enys. Yth yw hedna gwelys in Godhalek le may ma AlbaAlbain ow styrya Scotlond yn udnyk. In Sowsnek Scotlond y feu styr an hanow moy lymytys whath ha nyns esa ev ow referrya ma’s dhe’n radn a’n wlascor dhe’n north a Dhowr Forth. In Sowsnek Scotlond yma an hanow Albain owth apperya avell Albany. Y feu an tîtel Dûk Albany rës rag an kensa prÿs orth dyweth an peswardhegves cansvledhen gans an Tressa Robert, mytern Scotlond, dh’y vroder Robert Stewart. Y fedha ûsys an tîtel in Scotlond lowr gweyth wosa hedna. Pàn dheuth an Whefes Jamys a Scotland dhe vos an kensa Jamys a Bow an Sowson, y feu tîtel Dûk Albany in Scotlond kelmys gans an tîtel Dûk Evrok ‘the Duke of York’ in Pow an Sowson. In bledhydnyow try ugans an seytegves cansvledhen mytern Pow an Sowson ha Scotlond o an Secùnd Charlys. Y vroder Jamys o gwrës Dûk Evrok in Pow an Sowson ha Dûk Albany in Scotlond. I’n dedhyow-na yth esa gwlasva pò ‘colony’ in Ameryca North dhe’n Iselalmayn pò ‘the Netherlands.’ In rain an Secùnd Charlys an Sowson a gemeras an wlasva-na dhyworth an Iselalmans hag a jaunjyas radn a’n henwyn tyleryow inhy. Yth esa tre orth Dowr Hùdson dhe’n Iselalmans gelwys Beverwijk ‘tre lostledanas’ pò ‘town of beavers.’ An Sowson a ros dhedhy an hanow nowyth Albany in onour broder an mytern. In onour broder an mytern kefrës an dre aswonys avell New Amsterdam a veu das’henwys Evrok Nowyth ‘New York.’‚ I’n jëdh hedhyw Evrok Nowyth yw aswonys dhe bùbonen. Albany bytegyns yw chif-cyta an Stât a Evrok Nowyth.