(94) Abram - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An Nadelyk in gwiryoneth yw degol genesygeth Crist hag i’n seythednow-ma dhyrag Nadelyk yma Cristonyon ow perthy cov a’n bobel a dheuth dhyrag Jesus in istory Israel. An kensa den i’n whedhel-na yw Abraham, pò in Kernowek Abram. Ev a fùndyas pobel Israel hag ytho ev yw patryark an Yêdhewon. Duw a wrug promys dhodho gans an geryow-ma: In dha has jy oll an nacyons a’n bÿs a vëdh benegys. Pelha Abram o gostyth dhe gomondment Duw hag ytho parys dhe sacryfia y vab Isak. Yma an wharvedhyans-na kefys i’n gwary Kernowek Origo Mundi. I’n gwary Duw a gôws dhe Abram indelma:

Ow bolùnjeth mar mynnyth

y gollenwel heb let vÿth

dha vab Isak a geryth

y offrynna res yw dhis

war veneth a dhysqwedhaf.

Duw re bromyssyas dhe Abram y fedha ev hendas a bobel vrâs, saw ny’n jeva Abram ma’s udn vab gans Sara, y wrêg, hèn o Isak. Ha lebmyn yma Duw ow comondya dhodho ladha an mab-na. Heb govyn qwestyon vÿth yma Abram ow try y vab ganso dhe’n meneth rag y offra avell sacryfîs. Ny yll Isak convedhes prag nag eus best gansans avell offryn. Ev a wovyn:

Otta omma yn certan

prennyer genef dhe wil tan

degys a dre.

Ple ma an offryn, a das,

a vÿdh leskys dhe Dhuw ras

rag y wordhya?

Ny re Abram gorthyp dhodho. Pàn wrellons dos dhe’n tyller ewn, Abram a ergh dh’y vab settya an cunys wàr an alter ha growedha y honen ahës war an prednyer. Yth yw Isak clor ha ny wra va strîvya warbydn y das. Otta an gollan derevys in dorn Abram rag ladha y vab, pàn wrella Gabriel omdhysqwedhes ha leverel dhe Abram:

Abram, me a lever dhis

el a’n nev ov danvenys

rag gwitha na ve ledhys

dha vab Isak yw dha joy.

Yn pòr wir Duw a aswon

bolùnjeth oll dha golon;

rag henna omdenn yn scon

adhyworto ev defry.

Abram a gav hordh davas kechys in bùsh ryptho hag yma va ow sacryfia hedna in le y vab. An Beybel a lever fatell o mab aral dhe Abram, ha Hagar, servyades Abram, o y vabm ev. An mab-na o henwys Ishmael. Yma an Moslems ow consydra an mab-na dhe vos hendas oll an Arabs. Pelha y a grës nag o Isak a dheuth ogas dh’y vernans wàr an alter saw Ishmael. Kyn nag yw haval in pùb poynt whedhel Abram i’n Beybel ha’n whedhel adro dhodho in Islam, Abram i’n dhew dradycyon yw patryark ha den a grejyans vrâs.