© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording 

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Sen Sylvester yw person in Bêwnans Meryasek. Herwyth an gwary Kernowek, yma Costentyn, emprour Rom, ow compressa an Gristonyon fest tydn, saw lovryjyon a goodh wàr y grohen hag yma va ow sùffra yn uthyk. Costentyn y honen a grës fatell yw an cleves pùnyshment dhyworth Duw rag y gruelta dhe’n Gristonyon. Medhek Costentyn, heb conscyans vÿth, a wra dhodho cresy na vëdh ev sawys erna wrella omwolhy in goos a lies flogh ha spessly flehes a vo whath orth brodn aga mabm. Yma Costentyn ytho ow ry ordyr may fe flehes cùntellys ha ledhys dhe gafos aga goos. Yth yw moy ès teyr mil flogh cùntellys ha degys dhe’n emprour. Yma conscyans Costentyn orth y gnias hag ev a lever fatell yw warbyn lahys Rom an dra neb yw porposys ganso. Gwell via ganso merwel ès bos mar dhybyta dhe flehes inocent. Ytho ev a dhanvon oll an flehes tre hag a re mona dh’aga mabmow dhe berna boos ha dewas. An nos-na Costentyn a wel vesyon a Sen Peder hag a Sen Powl ow cùssulya dhodho kerhes Sylvester Pab, usy ow keles y honen dhyworth sorr an emprour. Pàn dheffa Sylvester yma Costentyn ow pesy besydhyans dhyworto. Kettel vo Costentyn besydhys, dre verkyl Duw y gleves hegas yw sawys. Ena Costentyn a re ordyr na ve onorys dres oll an wlas saw Crist yn udnyk. Res yw avowa nag usy narracyon Bêwnans Meryasek ow sewya re glos an gwiryoneth istorek. Ny wrug Costentyn y honen bythqweth compressa an Gristonyon ha nyns eus dùstuny vÿth y whrug ev godhevel hager-gleves crohen. Gwir yw bytegyns fatell wrug Costentyn crejyans sodhogyl a’n empîr a’n Gristoneth Gwir yw inwedh fatell o Sen Sylvester epscop Rom pàn wrug Costentyn comondya an ordnans-na. Sen Sylvester a verwys an jëdh dewetha a vis Kevardhu ha dres oll an osow cres degol Sylvester a vedha solempnys an jëdh-na. Res yw perthy cov nag o an unegves dëdh warn ugans a vis Kevardhu in bledhydnyow-na an jorna dewetha a’n vledhen. Saw orth dyweth an whêtegves cansvledhen y feu degemerys gans radn vrâs a Ewrop dedhyador nowyth, Dedhyador Gregory pò ‘the Gregorian Calendar.’ I’n tor’-na Degol Sylvester a dheuth dhe vos jorna dewetha an vledhen. Alena rag y whre pobel cùntell warbarth Degol Sylvester i’n nos rag wolcùmma an vledhen nowyth. Ny a elow an nos-na Nos Calan Genver pò ‘New Year’s Eve,’ saw wàr brâstir Ewrop an nos yw gelwys Degol Sylvester. Rag hedna me a lever dhywgh why oll: Banothow Degol Syvester re’gas bo ha Bledhen Nowyth Dhâ.