© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Hylaryùs Sans pò in Sowsnek ‘Saint Hilary’ a vewas i’n kensa hanter a’n peswora cansvledhen in Poitiers in Gal (Frynk hedhyw). Yth esa kebmys revrons dhe bobel Poitiers ragtho may whrussons y inia dhe vos aga epscop, soodh a recêvas ev adro dhe’n vledhen try hans ha hanter-cans. I’n termyn-na yth esa dyspûtyans wherow ow fâlja an eglos ow tùchya natur an Drynjys. An party ewngryjyk a levery fatell o an Mab, hèn yw dhe styrya, an secùnd person a’n Drynjys, kehaval in pùb poynt dhe’n Tas. Aga hontrarys o an Aryans hag y a levery nag o an Mab indella. Y a gresy y feu va formys gans an Tas avell creatur iselha ages Duw y honen. Hylaryùs o ewngryjyk yn tien hag onen a’n kensa taclow a wrug ev avell epscop o dhe gonstrîna epscobow Gal dhe emskemunessa epscop Arelate, rag ev o Aryan stordy. Hylaryùs a gôwsas warbydn Constantyùs an emprour inwedh, ha dre rêson a hedna ev a veu exîlys dhe Fryjy dres nebes bledhydnyow. Ev a dhewhelys dh’y epscobeth bytegyns. Hylaryùs a screfas yn fenowgh warbydn an Aryans hag awos y vos mar dhywysyk ow scodhya ewngrejyans warbydn eresy an Aryans, Hylaryùs yw onorys avell dyvyn brâs. Dhyworth cres an nawnjegves cansvledhen Hylaryùs yw aswonys gans an eglos Catholyk Roman avell onen a dhocturs an eglos. Y ferwys Hylaryùs in mis Genver i’n vledhen try hans whegh deg eth. Jorna y vernans o an tredhegves dëdh a’n mis ha’n jorna-na re beu solemnpys alena rag avell degol an sans. In Ûnyversyta Resohen, in Coljy an Drynjys in Dulyn hag in lies ûnyversyta aral yth yw termyn an gwainten pò ‘Spring Term’ gelwys Termyn Hylaryùs dre rêson degol an Sans dhe godha ino. Yma plu in West a Gernow pymp mildir dhe’n ÿst a Pensans neb yw henwys St Hilary. Yma campollys hanow an blu i’n whedhel Jowan Chy an Hordh le may ma mencyon gwrës a Gûn Sen Eler. Sen Eler ytho yw an Kernowek ewn rag an tyller gelwys ‘St Hilary’ in Sowsnek. Pelha mars on ny whensys dhe drailya ‘Hilary Term’ dhe Gernowek, ny a yll leverel Termyn Gool Eler.