© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Pàn wrella an auctours Kernowek côwsel adro dhe neb tra gwydn, ymowns y worth y gomparya dhe daclow dyvers. In Passio Christi yma Josef Baramathia ow teclarya an bedh a alabauster may fëdh corf Crist gorrys dhe vos maga whydn avell an leth. Wàr an tenewen aral Jowan Tregear ow côwsel adro dhe’n transfygùracyon a scrif fatell wrug fâss Crist shînya kepar ha’n howl; ha pelha y dhyllas a veu gwrÿs maga whynn avell an ergh. In Bêwnans Meryasek Costentyn emprour yw grêvys gans cleves uthyk wàr y grohen. Yma comendys dhodho badhya y honen in goos a flehes inocent, ha’y gùssulyador a lever: pàn vewgh in henna golhys yth ewgh gwynn avell crystal. Crystal i’n lavar-na yw benthygys dhyworth crystal in Sowsnek Cres. Yma ger aral in Kernowek bytegyns rag ‘crystal’ neb yw fest cotha. Saw gesowgh ny dallath orth an dallath. An ger Latyn rag ‘glass’ yw uitrum. Yma an geryow Sowsnek ‘vitreous’ ha ‘vitrification’ rag ensampyl ow tos dhyworth an keth gwredhen. Latyn uitrum a veu benthygys gans an tavosow Brethonek in termyn an Romans hag yma an ger owth omdhysqwedhes avell gweder ‘glass’ in Kernowek. Tregear rag ensampyl a scrif: kepar ha in gweder why a yll gwelas ha percevia agas bêwnans ‘as in a glass you can see and perceive your life’. Saw yma an ger Latyn uitrum ‘gweder’ owth apperya in Kernowek in form aral. Mar peu va benthygys aberth i’n Kernowek avell *uritum kyns ès uitrum, hedna a vynsa ry gwrÿs ‘crystal’ i’n tavas. Gwrÿs yw kefys moy ès unweyth in agan yêth ny. Ûsys yw gwrÿs rag côwsel adro dhe neppyth pòr wydn. In Passio Christi y fÿdh pows wydn gorrys adro dhe Grist ha consler Erod a lever: a’s gwyskens adhesempys adro dhodho ev mar mynn maga whynn avell an gwrÿs. Pelha in Bêwnans Ke, pàn wrella Modres traitour whelas dhe dhynya Gwynever an Vyternes dhe wil avoutry ganso, ev a lever dhedhy Arlodhes, gwynn avell gwrÿs, deun dhe’n chambour, me a’th pys, may hyllyn omacowntya. Wàr verr lavarow ytho ny a yll leverel hebma, rag ‘pòr wydn’ in Kernowek ny a yll gwil devnyth a’n comparyansow mar wydn avell leth ha mar wydn avell an ergh. An gwelha lavar bytegyns yw mar wydn avell an gwrÿs ‘as white as crystal’. Ha gwrÿs ena in y dhevedhyans yw form aral a’n ger gwelys in gweder ‘glass’.