(101) Teyr Cyta


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma dyw cyta i’n Beybel campollys moy ès unweyth i’n textow Kernowek: Jerùsalem ha Bethlem. Avês dhe’n dhyw dre-na yma mencyon gwrës i’n textow a cyta aral nag yw campollys ma’s i’n Testament Nowyth yn udnyk; hag a dhyw cyta erel nag usy ow pertainya dhe’n Beybel poynt. An cytas-na yw Rom, Keresk ha Loundres. Yma meur a’n gwary Bêwnans Meryasek ow kemeres le in Rom hag ytho yma hanow an cyta campollys liesgweyth i’n gwary. Yth yw radn a Bêwnans Ke settys in Rom kefrës hag yth yw an hanow Rom campollys yn fenowgh ino. Jowan Tregear o prownter catholyk hag yma va ow qwil lies mencyon a Rom. Otta neb tra a bris ow tùchya Rom. In Bêwnans Meryasek Costentîn Emprour a lever adro dhodho y honen:

Yth ov gelwys Costentîn

in Rom chif-cyta an bÿs

emprour cùrunys certan.

Pàn wrella Tregear côwsel adro dhe vernans Peder ha Powl in dàn an emprour dybyta Nêrô, ev a scrif: Ha in pana dyller a wrussons y sùffra martyrdom? Poran in Rom neb yw an penn ha chif cyta a’n bÿs. Yth hevel ytho dhyworth Bêwnans Meryasek ha dhyworth Tregear chif-cyta an bÿs dhe vos an tîtel ewn Kernowek rag Rom. Yth yw Keresk campollys in whedhel Jowan Chy an Hordh ha gans Tonkyn in y vardhonek Menja tus Kernowek bùs gosowes. Yma mencyon a Keresk gwrës gans Lhuyd moy ès unweyth hag ev a elow Jonathan Trelawny Ispak Keresk ‘the bishop of Exeter’Yma Keresk ow mênya ‘dynas wàr Dowr Exe’ ha hedna heb mar yw sens an hanow Sowsnek Exeter. In Kernowek yma an pooslev wàr an secùnd sylaben. Lebmyn gesowgh ny dhe veras orth an hanow Loundres. In y gescows Boorde a scrif Pes mildir eus alebma da Loundres? Hag in dornscrif Bilbao ny a red an lavar: me a res mos dhe Loundres mes a dhornow. Pelha yma Lhuyd, Gwavas ha Jowan Boson ow campolla Loundres. Ass yw hedna coynt! Pedn-cyta Breten Veur yw gelwys London in Sowsnek, saw apert yw fatell esa an Gernowyon orth y elwel Loundres. Loundres yw an hanow Bretonek neb a veu kemerys heb mar dhyworth Frynkek. Loundres o pell dhyworth Kernow ha wàr an dallath nyns o bern an dre dhe’n Gernowyon. Dell hevel ny wrussons kemeres dhodhans aga honen an hanow rag an cyta bys i’n dedhyow an Normans hag ena y a ûsya an form a vedha clôwys orth ganow an Vretonyon, hèn yw, Loundres.