(102) Bryjet ha'n Werhes


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Degol Bryjet in Wordhen yw an kensa dëdh a Whevrel. An jëdh-na yw onen a beswar dëdh qwarter an dedhyador Keltek ha dallath an gwaynten. Pelha yth yw Bryjet onen a’n try brâssa sans a Wordhen. An secùnd dëdh a vis Whevrel yw Degol Maria an Cantolyow. An jorna-na yma an eglos ow perthy cov a’n termyn may feu Crist presentys i’n templa gans Maria y vabm nebes seythednow warlergh y enesygeth. Yth hevel fatell yw an dhew dhëdh-ma, an kensa Whevrel ha’n secùnd Whevrel an udn termyn in oll an vledhen may ma dew dhegol dyvers yn tien ow tos an eyl warlergh y gela. Res yw fatell o cales rag pobel Wordhen convedhes prag yth esa degol Sanses vrâs ha degol a’n Werhes Ker Maria ow tos warbarth, ha pelha prag y fedha bleynorieth pò ‘precedence’ dhe’n sanses dhyrag mabm Crist. Rag styrya an negys an Wydhyly a wre derivas an whedhel-ma. Yth esa an Werhes Ker Maria ha Bryjet Sans ow kerdhes warbarth i’n pow. I’n termyn-na yth o an Werhes gyllys nebes mîsyow gans flogh, hèn yw gans Agan Savyour, hag yth esa hy ow perthy meth dre rêson nag o gour dhedhy. Maria ha Bryjet a welas dhyragthans i’n fordh bùsh a dus yonk ha’n Werhes a wrug meneges dh’y howethes pana vethek o hy metya gans an re-na rag dowt y dhe wil ges anedhy. Bryjet a welas harow gesys gans neb tiak ryb an fordh. Harow yw jyn rag gwil compes an dor kyns ès y aras. Bryjet a dherevys an harow wàr hy fedn ha payony strait in rag bys i’n bùsh a dus yonk. Hy a wrug indelha may halla hy tedna brÿs an rûth warnedhy hy honen. An dus yonk a wrug ges anedhy ha hy ow kerdhes drestans. Saw ny wrussons merkya an Werhes Ker ow slynkya in rag adhelergh dhedhans. Pàn dheuth an Werhes Ker ha Bryjet warbarth arta, an Werhes a wrug aswon meur râss dhe Bryjet hag a bromyssyas dhedhy rag hy aqwîtya y whre hy degol hy, Degol Bryjet, dos pùpprës dhyrag hy degol hy honen, hèn yw Degol Maria an Cantolyow. Heb mar nyns eus gwiryoneth istorek vëth i’n whedhel. Ny wrug an Werhes Ker ha Bryjet bewa i’n keth cansvledhen, nag in keth pow naneyl. A les yw an story bytegyns avell exampyl a’n fordh may whra pobel anlettrys desmygy whedhlow rag styrya taclow na yllons convedhes.