© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw degol Valentînùs solempnys an peswordhegves Whevrel avell dëdh brâs rag caroryon. Yth hevel nag yw nameur godhvedhys ow tùchya an sans-na nag a’n rêson rag y gelmy gans kerensa romantek. Herwyth udn versyon a’y vêwnans, Valentînùs o prownter Cristyon in secùnd hanter an tressa cansvledhen. I’n dedhyow-na yth esa an empîr Roman in peryl brâs. An empîr o feljys inter teyr radn. Pelha yth esa pobel wyls wàr oryon an empîr ow chalynjya gallos an Romans. An emprour neb a assoylyas an problemow-na o Clawdyùs Gothycùs. Ev a gonqwerryas an trîbys gwyls hag a wrug soweny dhe udnya an empîr. Ow tùchya Valentînùs bytegyns yma certan re ow cresy y feu dew dhen dyffrans a’n hanow-na. Martesen ny veu ma’s onen. Yth yw leverys adro dhe onen anodhans ev dhe vos prownter in Ùmbrya in Italy. Pelha y leveryr na wre an emprour Clawdyùs alowa dhe soudoryon Roman demedhy. Hedna o dre rêson ev dhe gresy y fedha soudoryon moy dywysyk ha moy hardh heb gwrageth ha heb flehes. Pelha nyns o res dhe dhen nowyth-demedhys bos soudour wàr neb cor. Herwyth an whedhel Valentînùs a dhefias ordnans an emprour hag a wre demedhy coplow Cristyon, may halla an gour prias goheles servys i’n lyjyons Rom. Rag hedna y feu Valentînùs gorrys dhe’n mernans hag yma va encledhys nebes dhe’n north a’n cyta. Yma certan scolers ow predery nag yw an whedhel adro dhe Valentînùs ow temedhy coplow Cristyon ma’s rêsonegyans pò ‘rationalization’. Y a grës y feu Valentînus kelmys gans kerensa romantek dre rêson y dhegol dhe godha wàr an peswordhegves Whevrel. Hèn yw an jëdh may fëdh edhnow ow tallath dôwys kesparow ragthans aga honen. Yth yw an kensa mencyon a’n edhnow kefys orth dyweth an peswordhegves cansvledhen in bardhonek Jeffry Chaucer henwys the Parlement of Foules pò ‘Seneth an Edhnow’. I’n brydydhieth-na Chaucer a lever: For this was on seynt Volantynys day Whan euery bryd comyth there to chese his make ‘Rag hebma a wharva degol Volantîn, pàn vo pùb edhen ow tos dhe dhôwys y gowethes’. A les ywa fatell usy Chaucer ow ry hanow an sans avell Volantyn. In Kembrek hanow an sans yw Folant. Nyns yw an sans na’y dhëdh campollys in tyller vëth i’n textow Kernowek. Avell hanow Kernowek rag an sans bytegyns me a vynsa comendya an form Volans, ha Degol Volans rag an peswordhegves Whevrel.