(107) Degol Maria mis Merth


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma degol brâs Cristyon ow codha in mis Merth yw aswonys in Sowsnek avell ‘the Annunciation.’ Hèn yw an jëdh may fÿdh Cristonyon ow perthy cov a dhynargh an arghel Gabriel dhe’n Werhes Ker Maria. Ev a wrug hy vysytya in Nazare ha declarya dhedhy y whre hy concêvya ha don Agan Savyour. Yma lavarow an el derivys in Awayl Sen Lûk indelma: ‘Na gebmer own, Maria, rag te re gafas favour in golok Duw. Hag awot, omdhon a wreth i’th vrës ha denethy mab ha’y elwel Jesu.’ An Werhes a worthebys: ‘Re bo an dra genef warlergh dha eryow.’ An jëdh-na a veu dëdh concepcyon Jesu hag ytho cresys o an jëdh dhe dhos naw mis poran dhyrag genesygeth Crist in termyn an Nadelyk. Rag hedna yma an degol ow codha wàr an pympes dëdh warn ugans a vis Merth. Dre rêson an jëdh-na dhe vos an prÿs may talathas istory an carnacyon pò ‘incarnation,’ i’n termyn eus passys yth o an pympes dëdh warn ugans a vis Merth kensa dëdh an vledhen. Yth o an mater indella in Breten Veur hag in Wordhen bys in cres an êtegves cansvledhen. Ena y feu chaunjys an dedhyador ha dallath an vledhen a veu môvys dhe Galan Genver. Yma an dedhyador coth ow pêwa bytegyns i’n vledhen arhansek pò ‘financial year’, usy ow tallath an kensa dëdh a Ebrel, nebes dedhyow warlergh an pympes warn ugans a vis Merth. Nyns yw hanow vÿth rag an ‘Annunciation’ kefys i’n textow Kernowek. In Bretonek yma moy ès udn term rag an jëdh, saw an hanow moyha sempel yw Gouel Maria Veurzh, hèn yw Gool Maria Merth. In Sowsnek an pympes warn ugans a vis Merth yw aswonys traweythyow avell ‘Lady Day.’ Rag hedna me a grës y vos fur sewya Henry Jenner ha gelwel an jorna Degol Maria mis MerthDegol agan Arlodhes. In agan dedhyow ny yma pobel ow solempnya ‘Mothering Sunday’ wàr an peswora Sul a’n Gorawys, hèn yw cres an Gorawys. I’n dedhyador coth, kynth esa Sul Pask degol hevuf, dre vrâs y whre an peswora Sul codha wàr an pympes dëdh warn ugans a vis Merth pò nebes dhyragtho pò nebes wàr y lergh. An pympes dëdh warn ugans, dell welsyn ny, yw Degol Maria mis Merth ha’n jëdh may feu declarys dhe’n Werhes y fedha hy mabm agan Savyour. Nyns yw marth ytho fatell veu Sul cres an Gorawys degemerys avell an jorna ewn rag onora kenyver mabm Gristyon.