© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth esen vy in airborth JFK in Evrok Nowyth warleny, ha me a welas ena avîsyans brâs wàr an fos ha warnodho an geryow rag ‘wolcùm’ screfys in lies tavas. An versyon Ebrow o: berûkhim ha ba’im ‘benegys yw an an re-na usy ow tos.’ An form a hedna i’n nyver udnyk yw barûkh ha ba’ ‘benegys yw ev usy ow tos’, lavar kebmyn in Ebrow Israel rag ‘Wolcùm osta’. Y feu an lavar kemerys in mes a’n Beybel. Salm cans hag êtek, gwers whegh warn ugans, a lever: Benegys yw neb a dheu in hanow an Arlùth! Yth yw devnyth gwrës a’n keth lavar i’n Testament Nowyth, pàn usy Jesu ow marhogeth aberth in Jerùsalem wàr geyn asen. Dell usy ow wharvos yma entrans Crist aberth in Jerùsalem in mesk vuys an gwary Kernowek Passio Christi, le may ma mebyon ow mos in mes dhe vetya gans Jesus. An kensa maw a lever:

Mab Davyd, dhis lowena!

Me a’th pÿs agan sawya

ha’gan dry dhe wlascor nev!

Benegys yw neb a dheu

in hanow Duw, dh’y lawa,

mytern Israel arlùth crev!

Yma Cristonyon ow solempnya an entrans in Jerùsalem De Sul dhyrag Sul Pask. In Sowsnek an jëdh-na yw gelwys ‘Palm Sunday’ dre rêson a’n branchys a wëdh palm spredys dhyrag Jesus hag ev ow marhogeth aberth i’n cyta. Nyns yw hanow Kernowek kefys rag ‘Palm Sunday’ marnas in Passyon agan Arlùth hag ena yth yw an jëdh henwys De Sul Blejyow ‘Sunday of Flowers’. Kyn nag yw an ger blejyow kefys in tyller vëth aral in Kernowek, Nance a gresy fatell o va an ger ewn rag ‘flowers’. Nance kefrÿs rag ‘flower’ a wre ûsya blejen, term in Kernowek Coth. Saw nyns yw blejen kefys in tyller vëth in Kernowek Cres. An geryow rag ‘flower’ ha ‘flowers’ in Kernowek Cres ha Kernowek Dewedhes yw flour ha flourys, hag yma an geryow-na kefys yn fenowgh. Ny a wel hedna in Passyon agan Arlùth y honen rag ensampyl, rag an text a gows adro dhe’n entrans in Jerùsalem indelma:

Wàr an fordh dyllas alês

a veu gorrys dhyragtho;

palm ha flourys kekefrës

er y bynn degys a veu.

Res yw ytho gwetha blejyow rag De Sul Blejyow yn udnyk. An Kernowek rag ‘flowers’ yw flourys.