(110) Sul Pask


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Sul Pask yw degol an Dasserghyans hag ytho an jëdh moyha a bris in oll dedhyador an Gristoneth. An Pask a veu avarr lowr hevleny rag y codhas wàr an kensa dëdh a vis Ebrel. Y hyll De Sul Pask bos mar avarr avell an tressa dëdh warn ugans a vis Merth ha mar holergh avell an pympes warn ugans a vis Ebrel. Dedhyow dyffrans an Pask yw drefen an jëdh dhe vos growndys wàr ‘Passover’ an Yêdhewon ha’n ‘Passover’ yw degol muvadow. Nebes coynt yw an Sowsnek i’n mater-ma, rag in Sowsnek yma udn hanow rag an degol Cristyon, hèn yw ‘Easter’, hag yma hanow aral rag ‘Passover’. In lies tavas aral nyns eus ma’s udn hanow ragthans aga dew. Yma an ger ‘Easter’ ow tos dhyworth Eostre, duwes an Angel-Saxons pagan esa hy mis i’n gwaynten. Pàn dheuth an Gristoneth, hy hanow a veu kemerys avell ger rag Degol an Dasserghyans. An ‘Passover’ yw an solempnyta pàn vo an Yêdhewon ow remembra lyfreson flehes Israel mes a gaptyvyta in Ejyp. Yma an whedhel in Lyver Exodùs. An ger ‘Passover’ a veu desmygys gans William Tyndale in y drailyans a’n Beybel. ‘Passover’ yw ger Tyndale rag Pesach in EbrowYma Pesach ow styrya ‘ev a bassyas dreson’. Hèn yw el Duw neb êth dres oll Ejyp ha ladha mebyon kensa-genys an Ejyptyons saw heb ladha mab vëth a’n Israelysy. In y form Aramek Pesach yw Pascha ha hèn yw an ger a dheuth Pask in Kernowek dhyworto. In Kernowek y hyll an ger Pask referrya dhe dhegol an Yêdhewon ha dhe dhegol an Gristonyon kefrÿs. De Sul Pask an Gristonyon yw recknys avell an kensa Sul warlergh an kensa loor leun wosa kehesnos an gwaynten pò ‘the spring equinox.’ Yma moy ès udn fordh dhe dhetermya an kehesnos-na. I’n dedhyow coth y whre eglos Rom ha’n eglos Keltek reckna dëdh an Pask in manerow dyffrans. Pàn dheuth Austyn Sans dhe Bow an Sowson, dhe bregoth an awayl, yth esa Cristonyon in north a’n pow ow solempnya an Pask herwyth ûsadow menegh Iona, hèn yw, wàr an gîss Keltek. Y feu strif hir adro dhe’n negys, saw assoylys veu wàr an dyweth in Seneth Whitby ‘the Synod of Whitby’ i’n secùnd hanter an seythves cansvledhen. Ena an Sowson i’n north a assentyas dhe reckna dëdh Pask kepar dell esa eglos Rom orth y wil. Lowr yw hedna adro dhe dhedhyans Pask. Yma govenek dhybm y cafas pùbonen a’m goslowysy Pask lowen ha na wrug den vëth debry re a oyow choclet.