(111) Ûnyversyta


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag ‘university’ Nance a dhesmygyas an ger penscol. Yth o hedna growndys dell hevel wàr prifysgol ‘chif-scol’ in Kembrek. Saw yth yw an ger ûnyversyta kefys in Bêwnans Meryasek. Yma an geryow university in Sowsnek hag ûnyversyta in Kernowek ow tos dhyworth an Latyn universitas magistrorum et scholarium pò ‘kemeneth mêstryjy ha scoloryon.’ Yma an radn vrâssa a Bêwnans Meryasek ow kemeres le in Breten Vian hag in Rom, hèn yw dhe styrya in Frynk hag in Italy a’gan dedhyow ny. I’n osow cres dyw a’n penscolyow moyha a bris in West a Ewrop o Ûnyversyta Bologna in Italy hag Ûnyversyta Montpellier in Frynk. Y feu ûnyversita Bologna fùndys i’n unegves cansvledhen. Gerys brâs o hy rag an studhyans a laha Roman. Penscol Montpellier in Soth-Ÿst a Frynk a veu fùndys yn sodhogyl i’n tredhegves cansvledhen saw yth esa scoloryon ow tesky ena cans bledhen moy avarr. Ha pelha y feu scol an laha in Montpellier fùndys gans scoloryon dhyworth Bologna hy honen. Gerys brâs o Montpellier kefrÿs rag hy scol a vedhegneth. I’n gwary Bêwnans Meryasek tas Meryasek a dhanvon y vab dhe vêster a gramer may halla va desky in dadno. Yma an mêster ow presentya y honen indelma:

My yw mêster a gramer,

gwrÿs in Bonilapper,

ûnyversyta vian.

My a wor meur in dyvyn.

Pàn ve leun ow thorr a win,

ny garaf cows ma’s Latyn.

An mêster a lever fatell veu ev deskys in Bonilapper, ûnyveryta vian. Yth hevel na veu an hanow Bonilapper desmygys gans auctour Bêwnans Meryasek y honen. Dre lycklod ev a’n cafas in y benfentydnyow. Pelha nyns yw an hanow Bonilapper kefys in ken tyller vëth. Ow thybyans yw inwedh nag o Bonilapper form wredhek an hanow, saw neb tra moy haval dhe *Bonylepper. Me a grës nag yw Bonilapper pò *Bonylepper ma’s hanow desmygys dre dowl in mes a henwyn an dhyw ûnyversyta vrâs, Bologna ha Montpellier. Mar teun ny ha gorra warbarth Bologna ha Montpellier (leverys gans an r orth an dyweth) ny a gav *Bolonpeller. Gwra comparya hedna gans Oxbridge gwrës in mes a Oxford ha Cambridge. Nyns yw cales desmygy fatell alsa *Bolonpeller dysplêgya gans treuscorrans an kes-sonyow pò ‘metathesis’ dhe *Bonylepper. Hèn yw, me a grës, gwredhen an hanow Bonilapper i’n Bêwnans Meryasek. Bologna ha Montpellier o martesen an dhyw ûnyversyta moyha a bris wàr brâstir Ewrop. *Bonylepper, pò Bonilapper wàr an tenewen aral yw leverys dhe vos penscol vian. Pàn veu an hanow *Bonylepper leverys rag an kensa prÿs, heb dowt an woslowysy a skydnyas in wharth.