(112) Pe dha recken


© 2018 Nicholas Williams

Pùb gwir gwethys / All rights reserved 

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n tavas hengovek yma lies lavar ow pertainya dhe spêna mona. Rag ensampyl in Creacyon an Bÿs nyns yw gwreg Noy parys, kyns ès hy dhe vos i’n lester, dhe dôwlel dhe ves taclow meur aga fris. Hy a lever Y costyens showr a vona ‘They cost a lot of money, they were expensive’. Bydner re wrellen ny ankevy fatell yw mona an ger ewn in Kernowek rag ‘money’. Arhans yw ‘silver’ yn udnyk. In tyller aral in Kernowek Dewedhes ny a red an kescows-ma: Ôstes, pandr’yw dhe be? ‘Waitress, what is my bill?’ Ha’n venyn a worthyp: Sera, agas recken yw pymp dynar ‘Sir, your bill is five pence’. Fordh aral rag leverel tra a’n keth sort yw gwelys in Bêwnans Meryasek le may lever den: Dhyso jy ev a gòst grôt ‘For you it will cost fourpence’. Recken yw onen a’n geryow rag ‘bill’. Ger aral yw scot, hag in Bêwnans Meryasek kefrÿs den a lever y vos parys dhe be an recken, hag yn medh ev: Wèl, wèl, me a be an scot ‘Well, well, I’ll pay the bill.’ Yma bardhonek gans Jowan Tonkin usy ow tallath Ny a venja pe an mona sur ‘We would certainly pay the money’. Ytho den a yll pe an recken, pe an scot ha pe an mona kefrÿs. Hedna oll yw dâ lowr, saw nyns eus lavar vÿth kefys i’n textow rag ‘I cannot afford it’. In y erlyver yma Nance ow comendya ny allaf ry kebmys ‘I can’t give as much’. Ny worama yw hedna vas rag pùb ocasyon. In Bêwnans Meryasek, pàn vo an chenon ow whelas inia Meryasek dhe dhegemeres an offys a epscop, ev a lever dhodho na vëdh tra vÿth dhe be ganso rag an benfys. Geryow an chenon yw: nyns êth in còst iredy ‘you will not indeed incur expense’. Lavar a’n par-na a alsa bos ûsys rag ‘It will cost you nothing.’ Nebonen a alsa leverel inwedh taclow kepar ha Ny’m beus lowr a vona rag y berna I can’t afford to buy it’. In ow gerlyver Sowsnek-Kernowek me a gomendyas ûsya an ger affordya rag ‘to afford’. Yth hevel dhybm lebmyn y vos nebes gwadn gwil devnyth a venthyk Sowsnek indella. Fordh well martesen rag leverel ‘I can afford,’ ‘I can’t afford’ yw gwil devnyth a’n ger pÿth ‘wealth, means, assets.’ Indella nebonen a alsa leverel Yma va dres ow fÿth perna chy in Keresk ‘I can’t afford to buy a house in Exeter’ pò Nyns yw dres ow fÿth lendya mil buns dhe’m myrgh ‘I can afford to lend my daughter a thousand pounds.’