(113) Sul Gwydn - Pencast


© 2018 Nicholas Williams

Pùb gwir gwethys / All rights reserved 

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An seythves Sul warlergh Pask yw gelwys Whitsunday in Sowsnek. An jorna-na yw an jëdh may fÿdh Cristonyon ow solempnya dieskynyans an Spyrys Sans wàr an abosteleth, kepar dell yw recordys in secùnd chaptra a Actys an Abosteleth. Whitsunday in Sowsnek wostallath o Whît Sunday pò De Sul Gwydn. Yma certan scoloryon ow cresy an hanow dhe referrya dhe’n dyllas gwydn adro dhe’n Gristonyon nowyth a vedha besydhys an Sul-na. Moy adhewedhes y feu an hanow Whitsunday kelmys gans an ger Sowsnek wit ‘skians’. Herwyth an narracyon i’n Testament Nowyth, pàn wrug an Spyrys Sans skydnya wàr an kensa Cristonyon, y a recêvas an ro a skentoleth brâs. Rag trailya Whitsun in Kernowek yma Nance ow comendya Sul Gwyn, hanow a wrug ev benthygya, dell hevel, dhyworth Kembrek. Hanow aral rag Sul Gwydn in Sowsnek yw Pentecost. Yma hedna ow tos dhyworth an ger Grêk Pentecoste ‘hanter-cansves dëdh’, hanow usy ow referrya dhe’n hanter-cansves jorna warlergh De Sul Pask. Wostallath y fedha an ger Pentecoste ûsys rag degol solempnys gans an Yêdhewon. I’n Testament Coth an jëdh-na yw gelwys Shavuot pò ‘Degol an Seythednow’ hag yma va ow wharvos hanter-cans jorna warlergh Pask an Yêdhewon, an ‘Passover.’ Degol an Seythednow o a bris brâs dhe flehes Israel rag dew rêson. Kyns oll, hèn o an jëdh may whre dallath mejy an gwaneth. In lyver Exodùs yth yw an jorna gelwys, ‘Gool an Seythednow, an degol a vleyn-frûtys trevas an gwaneth.’ Nessa, yth yw Degol an Seythednow an termyn may fëdh an Yêdhewon ow solempnya an ro a’n Deg Arhadow dhe bobel Israel dhywar Mownt Sinay. In mesk Cristonyon, bytegyns, Pentecost yw hanow aral rag dëdh dieskynyans an Spyrys Sans. In Kernowek yma Pentecoste owth apperya avell Pencast. Yth yw mencyon gwrës tergweyth gans Edward Lhuyd a’n hanow Pencast. In y Homylys yma Jowan Tregear hag ev ow côwsel adro dhe’n prymacy, ow qwil mencyon a vleynorieth Peder Sans a-ugh an abosteleth erel pàn dheuth an Spyrys Sans warnodhans. Tregear a scrif: Yth yw scrifys fatell wrug Peder kemeres warnodho in presens a oll an apostlys dhe gows in aga hanow y oll dhe’n bobel wàr Du Fencost myttyn, strait wharê wosa y dhe recêva an Spyrys Sans in hevelep a davosow a dan. In agan dedhyow ny yma eglosyow usy ow posleva royow an Spyrys in bêwnans an Cristyon. An re-na yw eglosyow Pencastak ‘Pentecostal churches’ ha’ga esyly yw Pencastogyon ‘Pentecostals.’