(116) 'King' in Kernowek


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An term Kembrek rag ‘king’ yw brenin. Hèn yw an keth ger avell bryntyn in Kernowek. Ymowns y aga dew ow tos dhyworth ragform kepar ha *brigantinos ‘den uhel, den nobyl’. An ger Bretonek rag ‘king’ wàr an tu aral yw roue. Hèn yw versyon a’n ger ruy ‘king’ kefys in Kernowek Coth. Roue in Bretonek, ruy in Kernowek yw goos nessa rhwyf ‘king’ in Kembrek Coth ha ‘king’ in Godhalek. Yma oll an re-na ow tos dhyworth an ger a ros rex, regis ‘king’ in Latyn. An ger ûsys rag ‘king’ in Kernowek Cres yw ger dyffrans yn tien: myghtern, mytern, gans an pooslev wàr an secùnd sylaben. Formys erel a’n keth ger yw mechdeyrn in Kembrek Cres ha machtiern in Bretonek Coth. Yth hevel fatell o an form wredhek anodhans neb tra kepar ha *maccotigernos ha’y styr gwredhek o ‘arlùth usy ow ry gwystel’ pò ‘lord who gives a surety’. Yn rêwlys hedna a ros myghtern, mytern in KernowekAn arlùth gwystel, dell hevel, o rêwlor bian, o res dhodho ry gwystel pò ‘surety’ dhe arlùth brâssa agesso y honen. Yma hedna ow styrya martesen prag y feu an ger mytern kemerys avell an term ûsys rag ‘king’ in Kernow yn udnyk. In Breten Vian hag in Kembra an mytern o dres pow brâs. In Kernow bytegyns an vyterneth i’n dedhyow coth o uvel dhe vyterneth brâssa agessans aga honen, dhe vyterneth Dùmnonia rag ensampyl. Yma ger aral in Kernowek rag mytern: hèn yw kyng, benthygys dhyworth Sowsnek. Pàn wrella tas Meryasek omdhysqwedhes kyns oll in Bêwnans Meryasek, ev a lever in y gever y honen:

Me yw gelwys Dûk Breten

ha sevys a woos rial

ha wàr an wlascor chyften

nessa dhe’n mytern uhel

kyng Conany.

Merkyowgh ena fatell yw ‘kyng Conany’ gelwys mytern uhel ‘high king’. Mars o an mytern arlùth bian in dadn arlùth brâssa, dre lycklod mytern uhel o an arlùth brâssa-na. Hag otta mater aral. An ger rag ‘kingdom’ in Kernowek Coth yw ruifanaid. Y feu hedna daspellys gans Nance avell revaneth hag yma certan Kernowegoryon in agan dedhyow-ny worth y leverel ruvaneth. Ytho y a lever an Ruvaneth Unyes rag ‘the United Kingdom’. Res yw avowa bytegyns nag yw revaneth/ruvaneth kefys ma’s unweyth in Kernowek Coth ha nyns ywa kefys in tyller vëth warlergh hedna. I’n textow gwlascor yw an ger rag ‘kingdom’. Pelha gwlascor ‘kingdom’ yw kefys moy ès deg gweyth warn ugans i’n tavas hengovek. Ytho rag ‘the United Kingdom’ yth esof vy ow preferrya an Wlascor Udnys.